Жиззах шаҳрида ЙПХ инспекторлари томонидан 36 та муддати ўтган қарздорлиги мавжуд бўлган транспорт воситаси аниқланди. Бу ҳақда Жиззах виляти ИИБ ЙҲХБ ахборот хизмати хабар берди.
Маълум қилинишича, ҳозирги кунда Жиззах шаҳрида рейд тадбирлари олиб борилмоқда. Тадбирлар давомида Spark русумли транспорт воситаси тўхтатиб текширилганда, муддати ўтиб кетган 36 та қарздорлик мавжудлиги аниқланган. Муддати ўтган қарздорликнинг умумий суммаси 12 миллион сўмдан зиёдни ташкил этади.
Мазкур транспорт воситаси тегишли тартибда жарима майдонига жойлаштирилган.
Аввалроқ Қонунчилик палатаси ялпи мажлисида доимий равишда қоидабузарликлар содир этганлик учун жарима баллари ҳисоблаш тизими жорий этилишини назарда тутувчи қонун лойиҳаси биринчи ўқишда кўриб чиқилгани тўғрисида хабар берилганди.
Қонун лойиҳаси билан таклиф этилаётган ўзгартиришларга кўра, Маъмурий жавобгарлик тўғрисидаги кодексга йўл ҳаракати қоидабузарликлари бўйича ҳисобланган жарима баллари белгиланган миқдордан ошганлик учун маъмурий жазо қўлланишига оид модда киритилмоқда.
Изоҳ (0)