Тошкент шаҳар Яккасарой туманида тўрт нафар фуқаро ноқонуний тарзда электромобилларни қувватлаш қурилмаларидан фойдаланиб келаётгани аниқланди, деб хабар беради “Ўзэнергоинспекция” матбуот хизмати.
Қайд этилишича, Энергетика вазирлиги ҳузуридаги “Ўзэнергоинспекция” томонидан тегишли ташкилотлар ҳамкорлигида Тошкент шаҳрининг Миробод ва Яккасарой туманларидаги электромобилларни қувватлаш қурилмаларида техник қоидаларга риоя қилинганлиги бўйича назорат тадбирлари ўтказилган.
Хусусан, Якксарой туманида тўртта истеъмолчи ўрнатилган тартибда ҳужжатларни расмийлаштирмасдан, электр ҳисоблагичсиз, кўп қаватли уйнинг бош тақсимлаш шитига уланган ҳолда, “Электр ҳисоб” дастурига киритмасдан электр энергиясидан ноқонуний фойдаланиб келаётгани аниқланган.
Мазкур истеъмолчилар электр тармоғидан ажратилди. Уларга нисбатан белгиланган тартибда чоралар кўриш учун тегишли ҳужжатлар ҳуқуқни муҳофаза қилувчи органларга тақдим этилди, — дейилади хабарда.
Маълумот учун, Ўзбекистонга январь октябрь ойларида хорижнинг 19 та давлатидан 22 492 та электромобил олиб келинган. Олиб келинган электромобилларнинг умумий қиймати 582,3 миллион долларни ташкил этиб, ўтган йилнинг мос даврига нисбатан импорт ҳажми 6 баробардан юқори ўсган.
Изоҳ (0)