“Исроил заифлашди”: Киссинжер ўлимидан олдин ҲАМАС билан уруш ҳақида нималар деган?

АҚШ собиқ давлат котиби Генри Киссинжер ўзининг сўнгги интервьюларидан бирида мустақил Фаластин давлати тузилишига қарши чиққан. Бу ҳақда Politico хабар берди.

Унинг фикрича, фаластинликлар ҳали ҳам Исроилни йўқ қилишга интилади ва Яқин Шарқда барқарор тинчлик бўлмайди. Америкалик сиёсатчи Исроил можарога барҳам бериш учун АҚШдан кўпроқ ёрдамга муҳтожлигини айтган.

“Исроил собиқ бош вазири Ариел Шарон муаммони икки давлат ечими билан ҳал қилиш мумкинлигини синаб кўриш учун Ғазони деярли мустақил қилди. Аслида, бу жуда мураккаб вазиятга олиб келди. Охирги икки йил ичида вазият 2005 йилдагидан анча ёмонлашди”, — деган Киссинжер 18 октябрь куни бўлиб ўтган онлайн конференцияда.

Шарон режасига кўра, 2005 йилда Исроил Ғазо секторидаги барча яҳудий аҳоли пунктларини ёпган ва у ердан ўз қўшинларини олиб чиққан. Тахминан икки йил ўтгач, сектордаги ҳокимият ҲАМАС ҳаракати томонидан тўлиқ қўлга киритилган.

“Яқин Шарқдаги яҳудийлар ва араблар ўртасидаги можарони икки мустақил давлат — Фаластин ва Исроилни яратиш билан ҳал қилиб бўлмайди”, — деган Киссинжер.

Унинг сўзларига кўра, “икки давлатли ечим” Исроил ва Фаластин ўртасида барқарор тинчликни кафолатламайди. Сиёсатчи Фаластиннинг бир қисми “Исроилни ағдариб ташлашга қатъий қарор қилишига” ишонган. У Ғарбий Соҳилни Иордания назоратига ўтказиш кераклигини айтган. Киссинжер Исроил энди ҲАМАС билан эмас, араб дунёси билан музокара олиб бориши кераклигини қўшимча қилган.

“Исроил ва Фаластин ўртасидаги тўғридан тўғри музокаралар самарали бўлишини кўрмаяпман”, — деган собиқ давлат котиби.

У Исроил атрофдаги араб давлатлари билан солиштирганда заифлашганини билдирган. Киссинжернинг фикрича, ҳозирги можарога барҳам бериш учун АҚШнинг фаолроқ иштироки зарур.

Бундан ташқари, сиёсатчи Россиянинг Яқин Шарқдаги позициясига баҳо берган. У Украинада уруш бошланишидан олдин Россия Исроилни қўллаб-қувватлаганини айтган.

“Агар Россия ҳозир аралашса, унинг иккита йўли бор: араблар томонида бўлиш ёки инқирозда воситачи бўлиш, бу Украина уруши нуқтаи назаридан ғалати бўларди”, — деб ҳисоблаган Киссинжер.