Jizzax shahridagi MCHJ 3 mlrd 840 mln so‘m yoki 19 200 ta xonadonning bir oylik iste’moliga teng miqdordagi tabiiy gazdan noqonuniy foydalangani aniqlandi. Bu haqda Energetika vazirligi axborot xizmati xabar berdi.
Unga ko‘ra, holat Energetika vazirligi huzuridagi “O‘zenergoinspeksiya” tomonidan huquqni muhofaza qiluvchi organlar va “Hududgaz Jizzax” gaz ta’minoti filiali bilan hamkorlikda Jizzax viloyatida o‘tkazilgan navbatdagi nazorat tadbirlarida aniqlangan. O‘rganish davomida mazkur MCHJga qarashli pigmentli bo‘yoq ishlab chiqarish korxonasining shartnoma va loyiha ijro-texnik hujjatlarida ko‘rsatilmagan 20 ta bo‘yoq pishirish pechi tarmoqqa o‘zboshimchalik bilan ulanib, tabiiy gazdan noqonuniy foydalanilayotgani ma’lum bo‘ldi.
Mazkur noqonuniy holatlar natijasida davlat manfaatlariga yetkazilgan umumiy zarar miqdori 3 milliard 840 million so‘mni tashkil etgan. Qoidabuzar iste’molchiga nisbatan belgilangan tartibda choralar ko‘rilib, tegishli hujjatlar huquqni muhofaza etuvchi organlarga taqdim qilindi.
Ma’lumot uchun: ushbu hajmdagi tabiiy gaz hozirgi kunda 19 ming 200 ta xonadonning bir oylik iste’molini tashkil qiladi.
Izoh (0)