Президент фармойиши билан Навоий вилоят суди раиси ва унинг ўринбосари лавозимдан олинди

Навоий вилоят судининг раиси ҳамда унинг ўринбосари лавозимдан олинди. Бу ҳақда Судьялар олий кенгаши матбуот хизмати хабар берди.

Маълум қилинишича, Ўзбекистон президентининг тегишли фармойшига мувофиқ, ёзма аризаларига асосан

• Ҳамидулла Қудратов Навоий вилоят судининг раиси лавозимидан;
• Абдуманнон Шайдоев Навоий вилоят суди раисининг ўринбосари – жиноят ишлари бўйича судлов ҳайъати раиси лавозимидан озод қилинган.

Ўзбекистон президентининг тегишли фармойши билан Абдулло Аллаев судьялик ваколати муддати даврининг беш йил муддатига Навоий вилоят судининг раиси лавозимига тайинланди ва шу муносабат билан Бухоро вилоят суди раисининг ўринбосари — жиноят ишлари бўйича судлов ҳайъати раиси лавозимидан озод қилинди.

Шунингдек:

• Гиёсиддин Ялгашев судьялик ваколати муддати даврининг беш йил муддатига Навоий вилоят суди раисининг ўринбосари – жиноят ишлари бўйича судлов ҳайъати раиси лавозимига;
• Илёсжон Усмонов судьялик ваколати муддати даврига Бухоро вилоят суди раисининг ўринбосари – жиноят ишлари бўйича судлов ҳайъати раиси лавозимига тайинланди.

Ўзбекистон президентининг тегишли фармойишига мувофиқ, бешта вилоят судларининг раислари ўзгарганди. 

Бундан олдин Ўзбекистонда 6 нафар судья лавозимида ўзгариш рўй бергани, Қашқадарёда фуқаро ногиронлик нафақасини ололмай қолганига сабаб бўлган судьяга чора кўрилгани, Судьялар олий кенгашида бир қатор янги тайинловлар амалга оширилгани тўғрисида хабар берилганди. 

Шунингдек, Ўзбекистонда 2023 йилнинг олти ойида 12 нафар судья лавозимидан озод қилиниб, ваколатлари муддатидан илгари тугатилган эди.