Сурхондарё вилоятининг Бандихон туманидаги 2-сонли умумтаълим мактабининг олий тоифали бошланғич синф ўқитувчиси Ҳабиба Бозорова мактаблардаги янги дарсликлар ҳақида гапириб, аввалги дарсликларга нисбатан ўқувчи учун анча қулай эканини айтмоқда. Ўқитувчи “Дарё” журналисти билан суҳбатда янги дарсликларнинг эски дарсликларга нисбатан устунлик жиҳатларини санаб ўтди.
Янги авлод дарсликлари таълим стандартлари талабларига жавоб бера оладиган, мукаммал қилиб яратилган. Китоблар дизайн жиҳатидан ҳам чиройли ишланган. Китоб муқовасининг ранглари ёрқин ва кайфиятни кўтарувчи. Китобни илк бор қўлимизга олганимизда рангларини кўриб хурсанд бўлганман. Бу ҳолатни ўқувчиларимда ҳам кузатдим. Аввалги дарсликларимиз билан солиштирганда янги дарсликларимиз ихчамлиги ва асосий фанларимизнинг тўрт қисмдан иборатлилиги билан алоҳида ажралиб туради. Ҳар бир чоракда алоҳида, биттадан китобни ўқиймиз. Китобни ўқиб тугатиш баробарида иш режани ҳам тугатамиз. Иккинчи чоракда эса китобнинг иккинчи чорак учун мўлжалланган иккинчи қисмини оламиз. Тез-тез алмашган китоб эскирмайди ва янги ҳолатини йўқотмайди, — дейди Бандихон туманидаги 2-сонли мактабнинг бошланғич синф ўқитувчиси Ҳабиба Бозорова.
“Янги дарсликлардаги топшириқлар расмлар асосида берилган, бу ўқувчи учун жуда қулай”
Ўқувчи эшитганидан кўра, кўрганини яхши эслаб қолади. Шу сабабданми янги дарсликлардаги топшириқлар расмлар асосида берилган. Дарслик қаҳрамонларининг фотороботлари ҳам бор. Азиза, Мадина, Умида, Жасур, Акмал ва Сардор исмли олти нафар қаҳрамонларимиз ўқувчиларга ўзининг тилида топшириқлар беради. Шунингдек, янги дарсликларимиз замонавий методлар билан бойитилган. Илгари биз бу методлар ҳақида интернетдан излаб топардик. Ва ўқувчиларга бажартирардик. Ҳозир эса ўша маълумотлар айнан янги дарсликларимизда жамланган. Бу нафақат ўқувчиларга, ўқитувчиларга ҳам қулай бўляпти. Қизиқарли топшириқлар орқали дарсга қизиқмайдиган ўқувчиларни ҳам дарсга қизиқтириб, ўқитяпмиз, — дейди у.
“Янги дарсликлар ўқувчиларнинг креатив, танқидий ва мантиқий фикрлашини оширади”
Дарсликларимизда мавзудан ташқари ёндаш мавзулар ҳам бор. Масалан Ботаника боғи ёки боулинг спорт турини олайлик. Ёндаш мавзу нима бўлса, топшириқлар ҳам шунга монанд бўлади. Масалан Ботаника боғи мавзусига, айнан шунга ўхшаш топшириқлар берилади. Янги авлод дарсликлари 4K модули асосида яратилган бўлиб, ўқувчиларнинг гуруҳ бўлиб ишлашида, креатив, танқидий ва мантиқий фикрлаши орқали ҳамжиҳатлилиги ошади. Дарсликларимиздаги топшириқларнинг барчаси ҳам ёзма тарзда бажариладиган топшириқлар эмас. Баъзиларини оғизаки шаклда бажарса ҳам бўлади. Қолаверса, синфда барча ўқувчи дарсларни бирдек ўзлаштиролмайди. Қўшимча топшириқлар эса иқтидорли ўқувчилар учун яратилган бўлади. Асосий топшириқларни тез бажариб, бўш қолган ўқувчиларга қўшимча топшириқлар бериб, уларни банд қиляпмиз. Бундан ташқари янги дарсликларнинг яна бир қулай, нафақат ўқитувчиларни, ўқувчиларни ҳам қувонтирган жиҳати она тили ва ўқиш дарслигининг алоҳида фан сифатида бир-биридан ажратилгани бўлди. Ўтган ўқув йилларида бу икки дарслик қўшилиб, яхлит қилинган эди. Она тили ва ўқиш фанларининг яхлитлиги ўқувчиларни қийнаб қўяётган эди. Янги дарсликларнинг яна бир қулайлиги Қуар-кодли бўлганида. Баъзи сабабларга кўра, дарсга келолмаган ўқувчи уйда, ота-оналари ёрдамида шу қуар-код ёрдамида дарс машғулотларини олиб, вазифасини бажариб, тенгдошларига қўшилиб олади, — дейди Ҳабиба Бозорова.
“Янги дарсликлардаги Alifбе дарслиги тубдан ислоҳ қилинган”
Биринчи синф ўқувчиларига янги ўқув йилидан бошлаб, информатика дарслари ҳам киритилгач, улар бу фанни қандай ўзлаштирар экан, дарс машғулотларини ўзимиз ўтамизми ёки бошқа ўқитувчилар ўтадими деган савол туғилганди. Дарсликларни қўлимизга олиб, мавзулари билан танишганимиздан сўнг мавзулари содда, ўқувчи ёши ҳисобга олингани ва бу фан Атрофимиздаги олам дарслиги билан чамбарчас боғлиқлигини кўрдик. Бу фан ўқувчиларимизнинг юқори синфларга ўтганида айнан шу фандан қийналмаслигига пойдевор вазифасини бажарар экан. Яна бир муҳим жиҳати биз ҳозирги кунда ахборот технологиялари замонида яшаяпмиз. Биринчи синфдан бу фанни ўқиб, ўрганиб боришса, IT соҳасини яхши ўрганиб олади. Янги дарсликлардаги Alifбе дарслиги тубдан ислоҳ қилинган. Китобнинг ҳар бир варағида олдинги ва кейинги ўтилган ҳарфлар ёзилиб кетилади. Ўқувчи олдин нима дарс ўрганини кўради ва ёдга олади. Бу йилги китобларга қўшимча Alifбедан машқ дафтари ҳам қўшилган. Бу ўқувчи учун янаям қулайлик яратади. Машқ дафтарида қизиқарли топшириқлар ҳам бор. Ёзув дафтарларимиз ҳам ўқувчилар учун жуда қулай шаклда яратилган. Технология ва тасвирий санъат фанларида ҳам топшириқлар жуда қизиқарли берилган. Айниқса технология китобида деталларни ясашнинг бошидан охиригача бўлган қисми кўрсатиб берилган. Буни кўрган ўқувчилар устоз ёрдамисиз ҳам топшириқларни бажара олишади. Математика дарслигида ўқувчининг пул билан муомала қилишини ўргатувчи топшириқлар ҳам берилган, — дейди ўқитувчи.
Изоҳ (0)