Наманган вилояти Чуст туманида алимент тўлашдан қочиб юрган эркак Оҳангарондан топилди. Бу ҳақда вилоят прокуратураси ахборот хизмати хабар берди.
Маълум қилинишича, алимент тўлашдан бўйин товлаб, яшириниб юрган ва давлат ижрочиси томонидан қидирувга берилган қарздорларни топиш ҳамда қонун устуворлигини таъминлаш мақсадида бюронинг Наманган вилояти бошқармаси томонидан ҳамкорликда тадбирлар ўтказилмоқда. Куни кеча олиб борилган навбатдаги қидирув тадбирлар давомида чустлик қарздор ота топилиб, унга нисбатан узоқ вақтдан бери алимент тўламагани учун жиноят иши қўзғатилди.
Р.Қ.га фуқаролик ишлари бўйича Чуст туманларо судининг қарорига кўра 2 нафар фарзанди учун то вояга етгунга қадар алимент ундириш белгиланган. Бироқ қарздор турли баҳоналар билан тўламай келгани учун жорий йилнинг апрель ойида ўн беш суткалик маъмурий қамоқни ўтаб чиққан. Бундан ҳам тегишли хулоса қилмай яна фарзандлари таъминотидан бўйин товлаб келади.
Қарздорликни қасддан тўламай яшириниб юради. Олинган маълумотларга кўра, қидирувдаги қарздор Тошкент вилояти Оҳангарон туманида юргани аниқланди ва тадбир давомида ушланиб, Чуст туманига олиб келинди. Ўтказилган суҳбат мобайнида қарздорлик салкам 15 миллион сўмга етгани, уни бартараф этиш тушунтирилди. Қайд этилишича, у яна масъулиятни ҳис этмади ва унга нисбатан жиноят иши юритилди.
Маълумот берилишича, жорий йилнинг ўтган даврида бюронинг Наманган вилояти бошқармаси томонидан қидирувга берилган 284 нафар қарздорларнинг 176 нафари топилган. Уларнинг 35 нафарига нисбатан жиноят иши қўзғатилган бўлса, 58 нафари эса маъмурий жавобгарликка тортилган. Олиб борилган профилактик ва тушунтиришлардан сўнг 320 млн сўм қарздорлик ундириши таъминланган. Бу каби тадбирлар давом этмоқда.
Изоҳ (0)