Президент Шавкат Мирзиёев бугун, 1 декабрь куни Дубайда Бирлашган Миллатлар Ташкилотининг Иқлим ўзгариши бўйича конференциясида иштирок этиб, нутқ сўзлади.
"Бугунги, ҳеч муболағасиз, тарихий саммитга таклиф этилганимиз ҳамда анжуманнинг юқори даражада ташкил қилингани учун Бирлашган Араб Амирликлари Президенти Муҳаммад бин Зоид Ол Наҳаён Аъло Ҳазратларига билдирилган самимий миннатдорчилик сўзларига қўшиламан.
Биз Амирликларнинг иқлим ўзгаришига қарши кураш борасидаги глобал ташаббусларини ҳамда унинг “яшил” тараққиётга қўшаётган катта ҳиссасини олқишлаймиз.
Фурсатдан фойдаланиб, Бирлашган Араб Амирликлари халқини Миллий байрами билан чин дилдан қутлайман ва бардавом фаровонлик тилайман.
Ҳурматли самми иштирокчилари!
Ҳозирги даврда иқлим муаммолари жаҳондаги барқарор ривожланиш йўлида энг асосий таҳдидга айланиб улгурди. Бу хавф-хатарлар ҳатто дунё геосиёсий архитектурасига ҳам таъсир кўрсатмоқда.
Иқлим ўзгаришининг салбий оқибатлари замонамизнинг энг аянчли экологик инқирозларидан бири – Орол фожиаси туфайли Марказий Осиё ва унга ёндош минтақаларда айниқса жиддий сезилмоқда.
Эътиборингизни қуйидаги фактларга қаратмоқчиман:
- минтақамизда ҳаво ҳароратининг ошиши жаҳондаги ўртача кўрсаткичдан икки баравар кўпдир. Сўнгги йилларда фавқулодда иссиқ кунлар сони икки марта ортди, музликлар майдонининг учдан бир қисми эриб йўқолди;
- минтақамиз ҳудудида тупроқ емирилиши жараёнлари 30 миллиондан зиёд аҳоли турмуш тарзига салбий таъсир кўрсатмоқда. Кучли чанг ва қум бўронлари одатий ҳолга айланиб бормоқда;
- ичимлик суви тақчиллиги, ҳаво ифлосланиши, биохилма-хиллик йўқолиши, қишлоқ хўжалигида ҳосилдорликнинг кескин пасайиши каби муаммолар тобора авж олмоқда.
Мухтасар қилиб айтганда, бу глобал хавфлар кенг минтақамизда ўзининг хатарли нуқтасига етиб келмоқда.
Ҳурматли анжуман қатнашчилари!
“Яшил” иқтисодиётга ўтиш ва углерод нейтраллигига эришиш Янги Ўзбекистоннинг устувор стратегик вазифасидир.
Сўнгги йилларда юртимизда муқобил энергия улуши икки баравар кўпайди. Биз Амирликлар, Саудия Арабистони, Қатар, Хитой, Туркия ва бошқа хорижий ҳамкорларимиз билан бирга 2030 йилга бориб 25 гигаватт қайта тикланувчи энергия қувватларини барпо этамиз. “Яшил” водород ишлаб чиқариш лойиҳаси бўйича илк амалий қадамларни ташладик.
“Яшил макон” ташаббуси доирасида ҳар йили мамлакатимизда 200 миллион туп кўчат экилмоқда. Шаҳарларда яшил ҳудудлар майдонини 30 фоизга етказмоқчимиз.
Орол денгизининг қуриган тубида мустаҳкам ҳимоя қалқонини яратиш мақсадида 2 миллион гектар майдонда ўрмонлар барпо этдик. Бу орқали Орол ҳудудида ҳаво ифлосланиши камаймоқда.
Ҳурматли хонимлар ва жаноблар!
Келажак авлодлар олдидаги масъулиятимизни теран англаган ҳолда, иқлим ўзгаришига қарши фақат бирдамлик ва кенг халқаро ҳамкорлик орқали самарали курашишимиз мумкин.
Бу борада қуйидаги таклифларни сизлар билан ўртоқлашишга ижозат бергайсиз.
Биринчидан. Париж шартномаси доирасида Иқлим ўзгаришига мослашиш соҳасидаги Глобал ҳадли механизмни тезроқ келишиш тарафдоримиз.
Биз Марказий Осиё иқлим мулоқоти платформасида Адаптация (Мослашув) стратегиясини ишлаб чиқмоқдамиз.
Шунингдек, бугунги конференциямизда “Йўқотиш ва зарарлар” глобал жамғармасини ташкил этиш масаласида ижобий силжишга эришилади, деган умиддаман.
Ушбу механизмлар Жаҳон банки ва халқаро молия институтлари томонидан фаол қўллаб-қувватланиши, энг аввало, иқлим ўзгаришидан катта азият чекаётган мамлакатларга салмоқли ёрдам беради.
Иккинчидан. Глобал миқёсда кам углеродли иқтисодиётга ўтиш адолатли, шаффоф ва инклюзив бўлиши зарур.
Бунда иқлим ўзгаришидан жиддий зарар кўраётган ривожланаётган давлатларнинг манфаатлари албатта инобатга олиниши шарт.
Бу долзарб муаммо “КАТТА ЕТТИЛИК” ва “КАТТА ЕИГИРМАЛИК” форматлари кун тартибларида доимий равишда кўриб чиқилиши мақсадга мувофиқдир.
Учинчидан. Биз Бирлашган Миллатлар Ташкилоти Бош Ассамблеясининг резолюцияси асосида Оролбўйи ҳудудини экологик офат зонасидан “инновациялар, технологиялар ва янги имкониятлар минтақаси”га айлантирмоқчимиз.
Бу ерда илғор билим, тажриба ва ечимларни қўллаш мақсадида Иқлим технологиялари халқаро экспо-хабини яратишда барчангизни яқин ҳамкорликка таклиф этаман.
Тўртинчидан. Даврнинг ўзи биздан иқлим ўзгаришига қарши курашда илм-фан ютуқларидан кенг фойдаланиш ва қўшма илмий тадқиқотларни фаоллаштиришни талаб этмоқда.
Тошкентдаги “Яшил университет” негизида ташкил этилаётган “Иқлим илмий форуми”да давлатларингиз етакчи олимлари ва экспертларини иштирок этишга чақираман.
Ер деградациясининг олдини олиш, сувдан оқилона фойдаланиш, озиқ-овқат хавфсизлигини кафолатли таъминлаш ва бошқа ўткир масалалар Форумнинг кун тартибидан жой олади, деб ишонаман.
Бешинчидан. Бирлашган Миллатлар Ташкилоти билан 2024 йили Ўзбекистонда "Иқлим миграцияси" мавзусида конференция ўтказиш ниятидамиз.
Шунингдек, Халқаро меҳнат ташкилоти билан ҳамкорликда “Яшил бандлик” дастури”ни ишлаб чиқиш, иқлим ўзгаришининг бандликка таъсирини Моделлаштириш марказини ташкил этишни таклиф қиламиз.
Иқлим муаммоларини самарали ечишга ёшларни фаол жалб қилиш учун КОП Ёшлар конференциясини юқори даражада ташкил этишга тайёрмиз.
Ҳурматли дўстлар!
Ўзбекистон иқлим ўзгаришига қарши кураш бўйича умумбашарий ғояларга доимо содиқдир.
Бу эзгу мақсадда келгуси йили Самарқанд халқаро иқлим форумини ўтказиш ва минтақавий ёндашувларимиз ўз ифодасини топган Бирлашган Миллатлар Ташкилоти Бош Ассамблеясининг алоҳида резолюциясини қабул қилиш ташаббусимизни қўллаб-қувватлашга чақираман.
Ишончим комил, бугунги саммитимиз натижалари сайёрамизнинг янада барқарор, фаровон ва хавфсиз келажагини таъминлаш йўлида дўст мамлакатларимиз ва халқларимизни яқинлаштиришга хизмат қилади.
Эътиборингиз учун раҳмат", — деди Шавкат Мирзиёев.
Изоҳ (0)