Вазирлар Маҳкамасининг қарори билан Қорақалпоғистон Республикасида жойлашган давлат мулки объектларини электрон танлов асосида энг яхши таклиф билдирган талабгорга инвестиция киритиш мажбуриятлари билан сотиш тартиби тўғрисидаги низом тасдиқланди, деб хабар беради Норма.
Оммавий савдоларга чиқарилган давлат мулки объектлари уч ой муддатда сотилмаган тақдирда, улар “E-auksion” электрон савдо платформасида танлов асосида энг яхши таклифни билдирган талабгорга инвестиция киритиш мажбуриятлари билан сотилади.
Ҳужжатда қуйидаги тартиб белгиланади:
- давлат мулки объектлари бўйича инвестиция мажбуриятлари миқдорини аниқлаш тартиби;
- танлов натижаларини расмийлаштириш ва давлат мулки объектини сотиш бўйича олди-сотди шартномасини тузиш тартиби.
Давлат мулкини сотиш учун танловни ташкил этишда қуйидагилар мажбурий равишда кўрсатилади:
- инвестиция миқдори;
- инвестиция киритиш муддати;
- давлат мулки объектининг янги бошланғич нархи миқдори.
Ҳужжат Қонун ҳужжатлари маълумотлари миллий базасида эълон қилинган ва 2023 йил 28 ноябрдан кучга кирди.
Аввалроқ президент қарори билан мамлакатдаги 20 та вазирлик ва идораларда янги инвестиция лойиҳаларини ишлаб чиқиш ва амалга ошириш бўйича “лойиҳа офислари” ташкил этилганди. Шунингдек, Тошкент шаҳри ҳокимлиги муассислигида давлат ва тадбиркорлик субъектлари ўртасида “кўприк” вазифасини бажарувчи “Тошкент Инвест компанияси” акциядорлик жамияти ташкил этилаётгани тўғрисида хабар берилганди.
Изоҳ (0)