Тошкент шаҳрида антисептик ишлаб чиқариш учун харид қилинган этил спиртини сотиб юборган МЧЖ раҳбарлари аниқланди, деб хабар беради Бош прокуратура ҳузуридаги департамент.
Қайд этилишича, департаментнинг Тошкент шаҳар бошқармаси томонидан терговга қадар текширувлар ўтказилди. Текширув давомида “М.Т.” МЧЖ масъул шахслари антисептик ва лосьон ишлаб чиқариш учун этил спирти ишлаб чиқарувчи корхоналардан харид қилинган 19,4 миллиард сўмлик 1 153 тонна этил спиртидан ушбу маҳсулотларни ишлаб чиқармасдан, сохта маълумотлар тайёрлаб, этил спиртини бошқа шахсларга нақд пулга сотиб юборгани аниқланган.
Шу каби “М.W.” МЧЖ масъул шахслари этил спирти ишлаб чиқарувчи корхоналардан антисептик ишлаб чиқариш учун харид қилган 8,9 миллиард сўмлик 402,6 тонна этил спиртини сотиб юборгани маълум бўлди.
Мазкур ҳолатлар юзасидан Жиноят кодексининг 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Наманган ва Фарғонада ҳам аҳолига ажратилган кўмирларни талон-торож қилган омбор мудирлари ушлангани, Ўзбекистонда сентябрь ойида қарийб 111,5 млрд сўмлик электр ва табиий газдан ноқонуний фойдаланилгани маълум бўлгани тўғрисида хабар берилганди.
Изоҳ (0)