АҚШ давлат котиби Энтони Блинкен Озарбайжон президенти Илҳом Алиев ва Арманистон бош вазири Никол Пашинян билан телефон орқали мулоқот қилди. Давлат департаменти матбуот котиби Метю Миллернинг айтишича, Блинкен икки етакчи билан ҳам “узоқ ва шарафли тинчлик келишувига эришиш” имкониятини муҳокама қилган.
Давлат котиби Алиев билан суҳбатида “узоқ чўзилган можаро ҳам озарбайжонлар, ҳам арманлар учун азоб-уқубатлар келтириб чиқарганини айтиб, тинчлик минтақадаги барчага фойда келтиришини таъкидлаган”, шунингдек, Боку билан ҳамкорликни мустаҳкамлаш имкониятлари ҳақида гапирган.
Пашинян билан эса Блинкен “АҚШнинг Боку ва Ереван ўртасида мустаҳкам ва муносиб тинчлик келишувига эришиш йўлидаги саъй-ҳаракатларини қўллаб-қувватлаши”ни муҳокама қилган.
“Давлат котиби АҚШнинг Арманистон суверенитети ва ҳудудий яхлитлигини қўллаб-қувватлашда давом этишини яна бир бор тасдиқлади ҳамда Арманистоннинг фаровон ва демократик келажак ҳақидаги қарашларини қўллаб-қувватлашга ҳаракат қилган ҳолда, у билан икки томонлама ҳамкорликни кенгайтиришга қаратилган саъй-ҳаракатларни қайд этди”, — деди Миллер суҳбатдан сўнг.
Озарбайжон ва Арманистон бир неча йиллардан бери тинчлик шартномаси бўйича музокаралар олиб бормоқда. Баҳорда Пашинян Тоғли Қорабоғни Озарбайжоннинг бир қисми сифатида тан олишга тайёрлиги ҳақида гапирганди. Боку 2023 йил сентябрда ҳарбий операция ўтказиб, минтақани ўз назоратига қайтарди.
Октябрь ойида Пашинян Озарбайжон билан тинчлик ва муносабатларни нормаллаштириш бўйича келишилган учта тамойилни келтирди: бир-бирининг ҳудудий яхлитлигини тан олиш, 1991 йилдаги Олмаота декларациясига мувофиқ чегараларни делимитация қилиш ва томонларнинг суверен юридиксияси асосида минтақавий коммуникацияларни очиш.
Изоҳ (0)