Ukrainada qor bo‘roni tufayli o‘n kishi halok bo‘ldi, yana 23 kishi, jumladan, ikki bola jarohat oldi, deb ma’lum qildi mamlakat ichki ishlar vaziri Igor Klimenko.
Uning so‘zlariga ko‘ra, Odessa viloyatida kuchli yomg‘ir va qor bilan birga kelgan bo‘ron oqibatida besh kishi halok bo‘ldi, yana 15 kishi jarohatlandi. Noqulay ob-havo bilan bog‘liq 254 ta qo‘ng‘iroqqa davlat favqulodda vaziyatlar xizmati bo‘linmalari tomonidan javob qaytarildi. 849 ta avtomashina shatakka olindi, qariyb ikki yarim ming aholiga yordam ko‘rsatildi.
Nikolayev viloyatida, Klimenkoning so‘zlariga ko‘ra, ikki kishi halok bo‘lgan, yana ikki kishi yaralangan. Qutqaruvchilarga 66 marta yordam chaqiruvi kelib tushgan. 144 ta avtomashina shatakka olingan.
Xarkov viloyati va Kiyevda yana uch kishi halok bo‘ldi, olti kishi yaralandi, dedi Ukraina Ichki ishlar vazirligi rahbari, tafsilotlarni oshkor qilmasdan.
Yomon ob-havo oqibatlarini bartaraf etish davom etmoqda. 27-noyabr kuni ertalab Ukrainaning 11 viloyatida 411 aholi punkti elektr taʼminotisiz qoldi.
Ukraina va Rossiyaning Qora dengiz mintaqalarida bo‘ron 26-noyabr kuni boshlangan. Kuchli shamol tufayli elektr uzatish liniyalari shikastlangan, yuz minglab odamlar elektrsiz qolgan. Rossiya rasmiylariga ko‘ra, anneksiya qilingan Qrim va Krasnodar o‘lkasida bo‘ron oqibatida kamida to‘rt kishi halok bo‘lgan.
Izoh (0)