Таиландда эркак тўйи куни келин ва унинг яқинларини отиб ташлади

Таиландда Чатуронг Суксук исмли эркак тўй куни келин, унинг онаси ва синглисини, шунингдек, яна бир меҳмонни отиб ўлдирди, деб хабар бермоқда BBC.

29 ёшли собиқ ҳарбий ва пара-спортчи ўзининг 44 ёшли рафиқаси Канчана Пачунтуэкни улар турмуш қурганидан бир неча соат ўтиб ўлдирди.

Маҳаллий ОАВ ёзишича, эркак кутилмаганда тўйни тарк этиб, қурол билан қайтган. У келиннинг онаси ва синглисини, шунингдек, тўйдаги меҳмонни отиб ўлдирган. Яна бир меҳмон жиддий жароҳат олган.

“Informator” ёзишича, қотилликдан кейин эркак ўз жонига қасд қилган.

Меҳмонлар зиёфатда куёвнинг кўриниши ғамгин ва қаттиқ маст эканини пайқашган. Улар Чатуронг рафиқасидан 15 ёш кичик экани сабаб ўзига нисбатан ишончсизлик ҳис қилганини таъкидлади.

Полиция маълумотларига кўра, Чатуронг собиқ аскар, у поезд босиб кетиб, бир оёғи узилганидан кейин ногирон бўлиб қолган.

Эркак ўтган йили Индонезияда бўлиб ўтган ASEAN Паралимпия ўйинларида сузиш бўйича кумуш медални қўлга киритган. Шунингдек, у келаси ой Таиландда бўлиб ўтадиган Жаҳон спорт ўйинларида иштирок этувчи спортчилар рўйхатига киритилганди, деб хабар берди маҳаллий ОАВ.