ОАВ Франция Ўзбекистон ва Қозоғистонга қирувчилар етказиб бермоқчилигини хабар қилди. Остона буни рад этди

Франциянинг Dassault Aviation авиакомпанияси Қозоғистон ва Ўзбекистонга Rafale қирувчи самолётларини етказиб бериш устида ишламоқда, деб хабар берди La Tribune нашри манбаларга таяниб.

Француз нашрининг ёзишича, ҳарбий самолётлар етказиб бериш президент Эммануэль Макроннинг ноябрь ойи бошида Остона ва Тошкентга ташрифи чоғида кўтарилган мавзулардан бири бўлган.

Манбалар Dassault Aviation бир неча ой давомида Франция икки томонлама муносабатларини чуқурлаштиришни истайдиган ушбу икки Марказий Осиё давлатига киришга фаол интилаётганини тасдиқлади, — деб ёзади La Tribune.

Нашрнинг ёзишича, Ўзбекистон 24 тагача қирувчини сотиб олиши мумкин. Шу билан бирга, Тошкент бошқа мамлакатларда ишлаб чиқарилган самолётларни ҳам кўриб чиқиши мумкин. Қозоғистон ҳам ўзининг жанговар самолётлар паркини янгиламоқчи, бироқ бу мамлакатга Rafale қирувчи самолётларини етказиб бериш истиқболлари ҳали “узоқ кўринади”, дейилади мақолада.

Айни пайтда Қозоғистон Мудофаа вазирлиги Kursiv’га Франциядан қирувчилар олиши ҳақидаги маълумот “ҳақиқатга тўғри келмаслигини” билдирган.

Rafale — Франциянинг Dassault Aviation компанияси томонидан ишлаб чиқилган тўртинчи авлод кўп мақсадли қирувчи самолёт. Қирувчи ўзининг илк парвозини 1986 йил июль ойида амалга оширган ва 2004 йилда Франция денгиз флоти ва ҳаво кучлари томонидан қабул қилинган.

Rafale тўп ва ракеталар билан қуролланган. У ҳаво-ҳаво ва ҳаво-ер синфидаги ракеталарини ҳамда ўрта масофага учадиган ядровий каллакларни олиб юришга қодир.

Самолёт Франциядан ташқари Миср, Ҳиндистон, Қатар ва Греция армиясида ишлатилади.

Ноябрь ойи бошида Франция президенти Эммануэль Макрон Қозоғистон ва Ўзбекистонда расмий ташриф билан бўлиб, ушбу республикалар раҳбарлари билан музокаралар ўтказганди. Унинг минтақага сафарларидан мақсад Франциянинг энергия хавфсизлигини яхшилаш эди, деб ёзади Bloomberg манбаларга таяниб. Унга кўра, хусусан, Қозоғистонда Макрон Францияга нефть етказиб бериш ва уран экспорти ҳажмини оширишга келишиб олган. Республикага ташрифдан сўнг France24 телеканали Париж Қозоғистонга мамлакат “суверенитетини мустаҳкамлаш” учун Ground Master 400 ҳаво ҳужумидан мудофаа радар тизимларини етказиб бериши ҳақида хабар қилди.