Бундан буён давлат органларининг хизмат вазифаси давомида олинган фото-видеони интернетда ҳақорат қилиш мақсадида тарқатиш учун маъмурий жавобгарлик, ҳатто 15 сутка қамоқ жазоси белгиланмоқда.
Олий Мажлис Қонунчилик палатасида мазкур қонун лойиҳаси консептуал жиҳатдан биринчи ўқишда қабул қилинди. Депутат Дониёр Ғаниев буни очиқлик сиёсатига зид деб ҳисоблашини таъкидлади.
“Қолаверса, бу ИИО тўғрисидаги давлат, ҳокимият бошқаруви органи очиқлик тўғрисидаги қонунларимизга ҳам тўғридан тўғри зид. Конституциямизда ҳам ахборот эркинлиги бор. Мана шу нарсаларни инобатга олиш керак. Қолаверса, энг хавотирлиси шуки — бу норма амалиётга кирадиган бўлса, баъзи мансабини суиистеъмол қилувчи, фуқаролар ҳуқуқ ва эркинлигини камситувчи ходимлар бундан бошқа мақсадларда: фуқаролар ҳуқуқларини бузишга, уларга нисбатан қўпол муомалада бўлишга ишлатишлари хавфи йўқ эмас. Энг ачинарлиси, бу акс натижа беради. Яъни бугун биз ИИО ходимлари фуқароларнинг ҳақиқий дўстига айланишини хоҳлаймиз. Бу каби нормалар эса ходимларга нисбатан ҳурмат ўрнини қўрқув, ишончи ўрнини шубҳа, севгисининг ўрнини нафрат эгаллашига хизмат қилади. Шу сабабли бу нормада биз жуда ҳушёр бўлишимиз керак”, — деган депутат.
Бир қанча ижтимоий тармоқ фаоллари ушбу қонун лойиҳаси юзасидан ўз муносабатларини билдирди. Хусусан, Отабек Бакиров ўз саҳифасида “Ўзбекистонни полиция давлатига айлантириш йўлида катта қадам ташланибди”, дея фикрларини ёзиб қолдирган.
“Биз маиший ташвишларга ўралаштирилиб, масалан, свет ва сув учун курашиб ётган пайтда Ўзбекистонни полиция давлатига айлантириш йўлида катта қадам ташланибди. Анонссиз, ҳеч бир жамоатчилик муҳокамаларисиз, дастёр парламент воситасида.
Обрўсизлантириш ва ҳақорат учун қонунчиликда жазо бор. Нормал ҳуқуқий давлатда бу қоидалар барча учун амал қилади.
Агар полиция ё ички ишлар ходимлари учун алоҳида қоидаларни белгилаш бошланса, куч, маъмурий ресурслар ва маблағлар нотенг тақсимлангани, айниқса, мустақил суднинг йўқлиги шароитида фуқароларни репрессив аппаратга “гаровга топшириб” қўйган бўламиз.
Полиция давлатига айланган давлатда полиция репрессиялардан ҳоли бўлади, деб ўйлаётган бўлсангизлар, қаттиқ адашасизлар”, — дея ёзган Отабек Бакиров.
Бундан ташқари, “Давлетовуз” Telegram-канали муаллифи Қобил Ҳидиров ҳам бу нормага ўз мулоҳазасини билдирган. Унинг таъкидлашича, Ички ишлар органлари норма билан ўзларини ҳимоялаб олмоқда.
“Йўл ҳаракати хавфсизлиги хизмати муҳим қонуннинг ичида ўзлари учун керакли нормани ҳам тиқиб кетишган. Ички ишлар ходимларини обрўсизлантириш мақсадида фуқаролар томонидан фото ёки видеотасвирга олиб интернет орқали тарқатилиши маъмурий, ҳатто 15 суткагача қамоқ билан жазоланишга сабаб бўлиши ҳақидаги норма киритилган.
Депутатлар ҳақорат қисмини чиқариб ташлашди, лекин обрўсизлантиришни қолдиришди. Очиқликка, мамлакатдаги трендга қарши қаратилган норма.
Лекин кўриниб турибдики, Ички ишлар органлари ўзларини ҳимоялаб олишмоқда. Ҳимоялаганда ҳам, қаттироқ жазо сўрашмоқда. Бу норма чиқарилиши керак. Шундоқ ҳам нотўғри ахборот тарқатганни, дарҳол топиб, узр сўраттириб, жазолашмоқда.
Қонун учала ўқишда ҳам қабул қилинди ва сенатга юборилди. Муҳокамаларни тўлиқ кўриш мумкин”, — дейди блогер.
Шу билан биргаликда, ҳуқуқшунос Хушнудбек Худойбердиев ҳам қонун лойиҳасини танқид қилган. Блогер ушбу қонун нормасига ҳеч қандай эҳтиёж йўқлиги ва бу эртага фақат зарар келтиришини қайд этган.
“Оғриган қулоқни даволаш эмас, кесишни хоҳлаётганлар ҳақида:
Бугун депутатлар кўп қонунлар қаторида яна битта антиқа қонунни ҳам тасдиқлабди.
Яъни ички ишлар ходимларини обрўсизлантириш мақсадида фуқаролар томонидан фото ёки видеотасвирга олиб интернет орқали тарқатилиши маъмурий, ҳатто 15 суткагача қамоқ билан жазоланишга сабаб бўлиши ҳақидаги қонун уч ўқишда тасдиқланиб кетибди.
Бу нима дегани?
Бу шу деганики, эртага бирорта нопок, ўз ишига нолойиқ ва қонунбузар ички ишлар ходимининг видеоси ёки суратини интернетга жойласангиз, сизга жамоатчилик назоратидаги фаоллигингиз, тизимни тозалашдаги ёрдамингиз учун раҳмат айтишмайди, балки аксинча 15 суткагача тиқиб қўйишади.
Аслида бунақа алоҳида моддага эҳтиёж борми?
Йўқ! Ушбу қонун нормасига ҳеч қандай эҳтиёж йўқ ва бу эртага фақат зарар келтиради.
Ҳозирги қонунларимизда ички ишлар ходимларининг қонуний талабларига бўйсунмасдан қаршилик қилганларга жазо борми? Бор!
Ички ишлар ходимини ҳақорат қилгани учун (хоҳ ҳаётда, хоҳ интернетда) жазо борми? Бор!
Ички ишлар ходимига туҳмат қилиб, уни обрўсизлантиргани учун жазо борми? Бор!
Бўлди-да, унда яна нима керак сизларга?
Ўзи амалиётда энг кўп сохта айблов қўйиладиган моддалардан бири — ички ишлар органлари ходимига қаршилик қилиш, деган модда эди, кимнидир 15 суткага қамаш керак бўлса, одатда мана шу “дежурний” айбловдан фойдаланишарди. Энди яна битта “дежурний” модда қўшиляпти, ички ишлар ходимини обрўсизлантирмоқчи бўлди, деб қамашлар кўпаяди. Чунки нима обрўсизлантириш-у, нима обрўсизлантириш эмаслиги ҳақида аниқ чегара йўқ.
Жуда ёмон иш бўлибди лекин”, — дейди Хушнудбек.
Изоҳ (0)