“Ўзбекистон энергетика тармоғида ўзига хос эталон лойиҳа” — президент Сирдарёдаги янги ИЭС ҳақида

Шавкат Мирзиёев 27 ноябрь куни Саудиянинг етакчи АCWА Power компанияси билан амалга оширилган лойиҳа — Сирдарё вилоятида 1500 мегаватт қувватли замонавий буғ-газ электр станциясини тармоққа улаш маросимида иштирок этганди. Давлат раҳбари тадбирда сўзлаган нутқида ушбу лойиҳани Ўзбекистон энергетика тармоғида ўзига хос эталон лойиҳа деб атади.

“Мана шундай ҳаяжонли дақиқаларда ишга туширилаётган янги Сирдарё иссиқлик электр станцияси Ўзбекистон энергетика тармоғида ўзига хос эталон лойиҳа бўлиб, мамлакатимиз иқтисодиёти тараққиётига беқиёс ҳисса қўшади”, — деди президент.

Қайд этилишича, у рекорд муддатларда, давлат кафолатисиз, тўғридан-тўғри инвестициялар ҳисобига энг замонавий ва энергия самарадор бўлган ана шундай йирик станция юқори сифатда қуриб битказилди. Қиймати 1,1 миллиард доллар бўлган ва қуввати 1,5 гига-ваттли ушбу станция 3 миллион хонадонни ва юзлаб саноат корхоналарининг электр энергиясига бўлган эҳтиёжини кафолатли таъминлайди.

Лойиҳа доирасида Хитойнинг жаҳондаги энг йирик компанияларидан бири –— China Energy бош пудратчи сифатида танланган бўлса, Япониянинг Mitsubishi компанияси энг илғор технологияларни мураккаб шароитларга қарамасдан, жадал етказиб берди.

 “Улар бизнинг 2030 йилгача 25 гигаватт қайта тикланувчи энергия қувватларини яратишга қаратилган улуғвор мақсад ва режаларимизни тўлиқ амалга оширишга жуда катта ҳисса қўшади. Бу муҳим лойиҳалар энергетика тармоғини модернизация қилиб, 4,5 миллиард куб метр табиий газни тежашга, атмосферага салкам 3 миллион тонна зарарли газлар чиқишининг олдини олишга хизмат қилади”, — деди давлат раҳбари.

Айни пайтда АCWА Power компанияси иштирокида Ўзбекистоннинг стратегик тармоғи бўлган энергетика соҳасида 8 миллиард долларлик йирик лойиҳалар самарали амалга оширилмоқда.