“15 суткага тиқасан, кими келса ҳам чиқармайсан”. Термиз ҳокими қонун ҳимоячиларининг кўз ўнгида Ўзбекистон қонунларини оёқости қилди 

Сурхондарё вилоятининг Термиз шаҳри ҳокими Ўктам Тўраевнинг зўравонлиги Ўзбекистондаги мавжуд қонунчиликнинг оёқости бўлишига олиб келди. Ҳоким бу қилмишини қонун ҳимоячиларининг кўз ўнгида амалга оширди. Шаҳар ҳокими ИИБ бошлиғига оғзаки топшириқ бериб, тадбиркорни 15 суткага қаматишга уринди. Аммо жамоатчилик эътирози бунга йўл қўймади. 

Ҳоким йиғилиш пайтида шаҳар ИИБ бошлиғига топшириқ бериб, тезда олиб бориб 15 суткага тиқасан ва жаримага тортасан деди. Кими келса ҳам чиқармайсан деб топшириқ берди, — дейди ҳоким зўравонлиги сабаб қамалиб, уч соатдан ортиқ ИИБ биносида ушлаб турилган тадбиркор.

“Дарё” журналисти билан суҳбатда бўлган сурхондарёлик тадбиркор, Шуҳрат Шерназаровнинг айтишича, у Термиз шаҳрида аҳоли томонидан чиқинди контейнерларига ташланган чиқиндини ташиш билан шуғулланувчи “Био техно эко” МЧЖ раҳбари сифатида фаолият юритади. 

Тадбиркорнинг айтишича, ҳоким зўравонлиги унинг шахсий кабинетида, йиғилиш пайтида содир бўлган. 

Ҳоким мени қаматиш ҳақидаги гапидан олдин ёнига чақириб олиб, бўйнимга мушт қўйиб, ташкилот раҳбарларининг олдида итариб юборди. Йиқилиб тушишимга сал қолди, ўзимни ўнглаб олдим, — дейди тадбиркор.

Суҳбатдошнинг айтишича, ҳокимнинг оғзаки топшириғидан сўнг, шаҳар ИИБ бошлиғи Ўткир Шукуров шаҳар ИИБдаги ходимларини чақирган. 

“Горотдел”дан иккита бола келди. “Участкавой”лар эмас эди. Келганлар ҳокимнинг хонасида қўлимга кишан тақишга уринди. Уларни итариб ташлаб, қўлимга кишан тақиш шартмас, ўзим бораман дедим. Мени “горотдел”га олиб кетишди, — дейди тадбиркор. 

“Био техно эко” МЧЖ раҳбарининг маълумот беришича, уни соат тахминан кечки 8 ларда олиб кетиб, кечаси 11:30 ларда қўйиб юборишган. 

Уларга қандайдир хабар келдими, нимадир бўлди. Шундан сўнг қўйиб юборишимиз керак деди, — дейди уч соатдан ортиқ қамаб қўйилган тадбиркор. 

Шуҳрат Шерназаровнинг тушунтиришича, унга аҳоли томонидан шаҳарнинг белгиланмаган ҳудудига ташлаб кетилган чиқиндини ўз вақтида йиғиштириб олмаслик, шаҳардаги лотокларни тозаламаслик айби қўйилган. 

Фуқаро ишга кетаётган пайтда шошиб, чиқиндини белгиланмаган жойга, дейлик йўл юзига ташлаб кетяпти. Изидан яна икки-уч киши шу ишни такрорлаб, шаҳарда чиқинди уюми пайдо бўляпти. Ҳоким эса менга шу белгиланмаган ҳудудга ташланган чиқиндини олмагансан деган айбни қўйяпти. Бундай иш менинг мажбуриятимда йўқ. Бу ишни Ободонлаштириш бошқармаси қилиши керак. Кейин яна менга “лоток”лар ичини ҳам тозаламадинг деб зулм ўтказди. Мен эса чиқинди контейнерларидаги чиқиндини олиб кетишга ваколатли эканимни айтдим, — дейди суҳбатдош. 

Тадбиркорнинг тан олишича, ҳоким ва унинг ўртасида шахсий адоват йўқ. Илгари қилинган иш учун ҳокимдан раҳмат эшитган пайтлари ҳам бўлган. 

Ҳоким яхши ишлаяпсан, раҳмат деб кўп айтган. Лекин ўша куни шунақа ҳолат рўй берди. Давлат ташкилотлари биздан 1,5 миллиардга яқин қарздорлиги бор. Аҳолининг эса салкам 15 миллиард сўмлик қарздорлиги бор. Буни ундириш бўйича бизга ҳеч ким ёрдам бермаяпти, — дейди у.

Шуҳрат Шерназаровнинг воқеани эсга олишича, ҳоким зўравонлиги рўй берган йиғилишда 14-15 нафар ташкилот раҳбарлари билан бирга, қонун ҳимоячилари ҳам бўлган.

Началник мелиса бор эди. Шаҳар прокурорининг ўзи бўлмаса-да, ходимлари бор эди, — дейди тадбиркор.

“Био техно эко” МЧЖ раҳбарининг қўшимча қилишича, ҳокимнинг жаҳлини чиқарган яна бир ҳолат, унинг ҳоким ёрдамчиси қилган қўнғироққа ўз вақтида жавоб беролмагани бўлган. 

Компанияда ўзимизнинг ички йиғилишимиз бўлаётган пайтда ҳоким ёрдамчиси қўнғироқ қилганди. Мен жавоб беролмаганман. Ҳоким ёрдамчиси телефон қилишидан бир соат олдин у билан гаплашгандим. Шунга қарамасдан ҳоким “помошникнинг номерини кўтармайсан ифлос”, дея ҳақорат қилди. Мен қилган ишимга, 24 соат ухламай шаҳарнинг тозалигини қилаётган меҳнатимга ачинаман. Доим шаҳарни тоза ва озода сақлайман, — дейди тадбиркор. 

Тадбиркорнинг билдиришича, у ўзига бириктирилган вазифаларни кўнгилдагидек бажариш учун яқинда 3 миллион долларга 30 та янги техника олиб келган.

Мақсади яхшимас, назаримда. Бир йилдан бери ташкилотимни ёпишга уринишяпти. Техникани баҳона қилишганди. Мана 30 та янги техникани 3 миллион долларга олиб келиб қўйдим. 24 соат ишлаяпти. Шунга қарамай яна баҳона қилишяпти. Инвестиция киритганимдан пушаймон бўляпман, — дейди тадбиркор. 

“Дарё” манбасининг маълумот беришича, шаҳар ҳокими талаби билан маҳалла раисларига топшириқ берилиб, тадбиркорнинг ишидан камчилик топиш, уни маҳаллий ОАВлар орқали сазойи қилиш ҳақида топшириқ берилган. 

“Дарё” воқеалар ривожини кузатишда давом этади.