Афруза Ҳамдамова: “Мақсадим — аёллар ўртасида энг ёш гроссмейстерга айланиш” (видео)

Италияда шахмат бўйича ёшлар ўртасидаги жаҳон чемпионати бўлиб ўтди.

Унда 14 ёшгача бўлган спортчилар орасида ўзбекистонлик Афруза Ҳамдамова жаҳон чемпиони унвонига сазовор бўлди. Қайд этиб ўтиш жоиз, Афруза Ўзбекистон тарихида қизлар ўртасидаги илк жаҳон чемпионига айланди.

26 ноябрь тонгида Афруза Ўзбекистонга қайтиб келди. Спортчи мусобақа жараёни, чемпионлик таассуротлари билан бўлишди. 

Мен ушбу ғалабамни халқимга, президентимга бағишлайман. Рақибларимнинг барчаси яхши шахматчилар эди. Уларга қарши бир неча йилдан буён ўйнаб келганим сабабли, қандай юришларни амалга оширишини ёддан билардим. 

Асосий ўйинларда қора рангларда ўйнаш қийинчилик туғдирди. Агар улар хато қилсагина менинг ғалаба қозониш имкониятим ошарди. Хато қилмаса, ўйин дуранг билан якунланарди. 

Рақибларимнинг асосий камчилиги охирида эндшпилда яхши ўйнай олмаслиги бўлди. Шу сабабли қайси рангда бўлишимдан қатъи назар эндшпилда ғалаба қозондим. Энг катта мақсадим — Ўзбекистон байроғини баланд кўтариш, аёллар ўртасида энг ёш гроссмейстерга айланиш. 

Афруза Ҳамдамова, шахмат бўйича жаҳон чемпиони

Шунингдек, Афрузанинг онаси ҳам уйдаги шахматга бўлган муносабат, қизининг чемпионлигидан нақадар хурсанд бўлгани ҳақида айтиб ўтди. 

Она сифатида жудаям хурсандман. Фарзандининг ютуғини кўриш, ҳар қандай онанинг орзуси. 

Мусобақага кетишдан олдин виза билан боғлиқ муаммолар бўлди. Шу сабабли 1 та турни ўтказиб юборди. Шунда ҳам бораверасанми, ютишингга кўзинг етадими, деган саволга ўйланиб қолди-да, ютишимга 80 фоиз ишончим комил деб жавоб берди.

Қизим чемпионлиги билан Ўзбекистон тарихига кирди. Дадаси қўнғироқ қилиб, хабарни етказганида, жудаям хурсанд бўлдим. 

Оилавий муҳит энг асосий сабаб. Чунки дадаси ҳам, амакилари ҳам шахмат билан шуғулланиб келган. Дадаси мураббий сифатида жуда қаттиққўл. Дада сифатида қараганда, бу ютуқларга эриша олмасди деб ўйлайман.

Шабнам Исматова, Афруза Ҳамдамованинг онаси