Тошкент шаҳрининг Олмазор тумани ҳокимлигидаги мажлисда йиқилиб тушган маҳалла раиси вафот этгани хабар берилганди. Бош прокуратура ахборот хизмати раҳбари Ҳаёт Шамсутдиновнинг “Дарё”га маълумот беришича, ҳолат юзасидан туман прокуратураси томонидан терговга қадар текширув ишлари бошланган.
Жорий йилнинг 24 ноябрь куни соат тахминан 11:30 ларда Олмазор тумани ҳокимлиги мажлислар залида “Янги Себзор” МФЙ раиси 1958 йилда туғилган Муродбеков Шавкат Маҳмудович вафот этган. Мазкур ҳолат юзасидан Олмазор тумани прокуратураси томонидан терговга қадар текширув ҳаракатлари олиб борилмоқда, — дейди Ҳаёт Шамсутдинов.
Мажлисда вафот этган раис воқеаси ҳақида “Дарё”га хабар берган манба ҳокимият масъулларининг 40 кундан бери давом этаётган мажлисбозлиги бир инсон ўлимига сабабчи бўлганини билдирганди.
Бу мажлисбозлик қачон тугайди? Ҳар кун бир соатлаб кўчада совуқда туряпмиз, — деганди у.
Изоҳ (0)