Шавкат Мирзиёев 17 ноябрь куни Сурхондарёга ташрифи чоғида вилоятни ижтимоий-иқтисодий ривожлантириш юзасидан йиғилиш ўтказиб, унда сув муаммосига тўхталди.
Президент матбуот котибининг ёзишича, йиғилишда давлат раҳбари яқин 20 йилда Амударё ва Сирдарё оқими 15 фоиз камайиши кутилаётганини таъкидлади. Сув тежовчи технологиялар кенгайтирилаётгани, лекин бу етарли эмаслиги қайд этилди.
Маълум қилинишича, Сурхондарёда 80 фоиз ерлар насос орқали суғорилади. Бироқ 52 та насоснинг хизмат муддати 40 йилдан ошган. Оқибатда, сув таннархи 2 баробар қимматга тушяпти, йилига 20 миллион киловатт соат электр беҳуда сарфланяпти, яна 20 минг гектарда сув таъминоти ёмонлашган.
Шунингдек, 1 минг 700 километр суғориш тармоғининг ярми тупроқ ўзанли бўлгани учун 35 фоиз сув йўқотиляпти.
“Сув текин эмас, деган ғояни аҳолига чуқур сингдириш, уни маҳалла фаоллари, нуронийлар, зиёлилар ва кенг жамоатчилик билан бирга кундалик турмуш қоидасига айлантириш асосий вазифа бўлиши лозим”, — деган президент.
Мутасаддиларга 47 та канални бетонлаш бўйича икки йиллик дастур ишлаб чиқиш, сув йўқотилиши кўп бўлган 6 та канални таъмирлаш, келгуси йилда “Шеробод магистрал” каналини таъмирлашга 60 миллион доллар жалб этиб, 90 минг гектар ерларни тиклаш бўйича топшириқ берилди.
.jpg)
Президент қанчалик қийин бўлмасин, “Тўпаланг” сув омборидан Термиз шаҳри ва 11 та туманга тоза ичимлик суви олиб келинаётганини ҳам айтиб ўтди. Унинг сўзларига кўра, 1 миллиондан ортиқ воҳа аҳолиси учун тоза ичимлик суви орзу бўлиб келаётганди., мазкур лойиҳа тўлиқ ишга тушгач, 2 миллион аҳолида тун-у кун тоза ичимлик суви бўлади.
Изоҳ (0)