ИИВ Тезкор-қидирув департаменти ҳамда ҳудудий ички ишлар органларининг Тезкор-қидирув хизматлари томонидан энергия ресурсларини талон-торож қилиш билан боғлиқ ҳолатларга чек қўйилмоқда.
Хусусан, Бухоро вилояти ИИБ Тезкор-қидирув хизмати томонидан ҳамкорликдаги тезкор тадбир ўтказилган. Тадбир давомида Бухоро шаҳар Шербудин кўчасида яшовчи шахснинг хонадонида ноқонуний майнинг фирмаси ташкил этилгани аниқланган.
Хонадонда 14 дона майнинг қурилмаси юқори кучланишли кабел ёрдамида ишлатиб келинган. Бухоро вилояти электр тармоқлари корхонасининг қайд этишича, хонадон соҳиби салкам 2,66 миллиард сўм миқдорида зарар етказган.
Мазкур ҳолат юзасидан терговга қадар текширув ҳаракатлари олиб борилмоқда.
Шунингдек, Наманган шаҳар “Юқори Ровустон” маҳалласи ҳудудида жойлашган темир эритиш ва металл маҳсулотлари ишлаб чиқариш цехи электр ҳисоблагич расмийлаштирмасдан, электр энергиясидан ноқонуний фойдаланиб келган. Мазкур цех давлат бюджетига 1,6 миллиард сўмдан зиёд моддий зарар етказилган.
Ҳолат юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят иши қўзғатилган.
Тошкент вилоятида ўтказилган тезкор тадбирда эса Оҳангарон шаҳрида жойлашган кўп тармоқли хусусий корхонасида ҳам ноқонуний ҳолатга чек қўйилган. Ташкилот томонидан юқори кучланишли электр тармоғига уланиб олиб, давлат бюджетига 635,4 миллион сўм зарар етказилган.
Изоҳ (0)