Андижон вилояти, Марҳамат туманидаги мактаб ўқитувчиси ўз маошидан аълочи ўқувчиларга стипендия берди.
Мактабгача ва мактаб таълими вазирлиги матбуот хизматининг хабар қилишича, 30 йилдан буён рус тили ва адабиёти фанидан дарс бериб келаётган 6-мактаб ўқитувчиси Ёрқиной Маматисоқова хорижлик педагоглар томонидан йўлга қўйилган тажрибани ўзи дарс берадиган 10-синф ўқувчиларида синаб кўришни мақсад қилди.
I чорак якуни бўйича 4 нафар аълочи ўқувчини аниқлаб, уларга синф раҳбарлиги учун тўланаётган маошидан “Устоз стипендияси” беришни йўлга қўйди. У яна 12 нафар аълочи ўқувчиларини ҳам тақдирлаган.
Педагогнинг сўзларига кўра, бу йўл билан у бошқа ўқувчиларнинг ҳам яхши ўқиши учун мотивация бера бошлади. II чоракдан стипендия олиш учун кўп ўқувчилар ҳаракат қилмоқчи.
“Бу стипендияни жорий қилганимдан сўнг ўқувчиларимнинг ота-онаси қўнғироқ қилиб, раҳмат айтишди. Фарзанди уйга пул солинган конвертни очмай олиб бориб, ота-онасига берганини қувонч билан гапиришди. Оила даврасида очилган конвертни уй тўрига қўйиб қўйишибди. Ўқувчиларим кўзидаги қувонч менга олаётган маошимдан кўра кўпроқ ҳузур берди”, — деган Ёрқиной Маматисоқова
Хабарда ўқитувчининг маоши қанчалиги ва ўқувчиларга берилган стипендия миқдорига аниқлик киритилмаган.
Изоҳ (0)