Си Цзиньпин АҚШни санкцияларни бекор қилиш ва Тайванга қурол етказиб бермасликка чақирди

АҚШ Хитой ва Тайванни тинч йўл билан бирлашишини қўллаб-қувватлаши ҳамда экспорт назоратидан воз кечиши керак. Бу ҳақда Хитой етакчиси Си Цзиньпин Сан-Францискода президент Жо Байден билан бўлиб ўтган учрашувда маълум қилди, деб хабар беради Sinxua агентлиги.

“АҚШ мунтазам равишда Хитойга қарши экспорт назорати, инвестициявий чекловлар ва бир томонлама санкцияларни қўллаб, Хитойнинг қонуний манфаатларига жиддий зарар етказмоқда. Умид қиламизки, Америка томони Хитойнинг хавотирига жиддий қарайди, бир томонлама санкцияларни олиб ташлаш бўйича чора кўради ҳамда Хитой компаниялари учун адолатли ва камситмайдиган муҳитни таъминлайди”, — деган Си Цзиньпин.

У, шунингдек, Вашингтонни “Тайван мустақиллигини” қўллаб-қувватлашдан бош тортишга ва оролга қурол етказиб беришни тўхтатишга чақирган. Си Цзиньпин Тайваннинг Хитойга қўшилишини “муқаррар” деб атаган.

Умуман олганда, Хитой еткачиси ҳамкорлик, глобал муаммоларни биргаликда ҳал этиш, можароли вазиятларни юзага келтирмаслик, диалогларни кенгайтиришни ёқлаб чиққан. “Хитойнинг АҚШ ўрнини эгаллаш ёки ундан ўзиб кетиш режаси йўқ ва АҚШда ҳам Хитойни босиб ҳамда тутиб туриш бўйича режалар бўлмаслиги керак”, — дея таъкидлаган Си Цзиньпин.

Аввалроқ АҚШ президенти Жо Байден Хитой раиси Си Цзиньпинни олдингидек диктатор дея ҳисоблашини маълум қилганди.