Шридеви Болливуднинг энг гўзал ва ёрқин юлдузларидан бири эди – у 4 ёшга тўлиб-тўлмай фильмларда рол ижро эта бошлаган, қўшиқ куйлаб, рақс тушиб, мухлисларнинг эътиборини ўзига қаратганди. Актриса ижодий фаолияти мобайнида нақ 300 та фильмда турли ролларни ижро этган. Шридеви нафақат Ҳиндистон, балки дунёнинг турли бурчакларида яшовчи кино шинавандаларининг кўнглидан жой олган актриса эди. Соҳибжамол ижодкорнинг кутилмаган вафоти унинг яқинлари ва мухлислари учун ҳақиқий зарба бўлгани муболаға эмас. Ижодкорнинг ўлимига доир тергов ишлари ҳалигача якунига етмаган: Шридевининг Дубай шаҳрига тўй маросимида иштирок этиш учун бориб, тўсатдан вафот этиши билан боғлиқ масала ҳамон жумбоқлигича қолмоқда.
1963 йилда дунёга келган тамил миллатига мансуб актрисага оила аъзолари Шри Амма Янгер Айяпан деб исм беришган. Актрисанинг онаси оддийгина уй бекаси, отаси эса адвокат бўлиб, қўғирчоқдек ташқи кўринишга эга қизларидаги актёрлик маҳоратини унинг болалик йиллариданоқ пайқаган. Қизалоқ ўта ёқимтой бўлиш билан бирга зийрак ва уқувли эди: у тамил тилидан ташқари ҳинд, телугу, малая тилларида ҳам сўзлаша олган. Бу эса актрисага келгусида фақат ҳинд тилидаги фильмлар ишловчи киностудиялар билан ҳамкорлик масаласида чекланиб қолмасликка имкон берган. Актриса ўз даврининг энг келишган актёрлари – Рами Рао, Анил Капур, Амитабх Баччан, Митхун Чакрабортилар билан роллар ижро эта бошлади. “Карма”, “Қасос”, “Жаноб Ҳиндистон”, Муҳаббат лаҳзалари” каби муваффақиятли лойиҳаларда иштирок этди. Ҳинд киноси мухлислари томонидан ҳалигача севиб кўриладиган “Ўғри Чанду” фильмидаги роли учун актриса бир нечта нуфузли мукофотларни қўлга киритди.
Шридевининг ташқи кўриниши ҳар томонлама бенуқсон эди: унинг юз тузилиши қадимги ҳинд мумтоз суратларидаги гўзаллар қиёфасини ёдга соларди.
Чарос кўзлар, қалин лаблар, чиройли шаклга эга бурун... Актрисанинг душманлари унинг бурни пластик жарроҳлар ёрдамида шу кўринишга келтирилгани ҳақида миш-миш тарқатган бўлсалар ҳам, Шридевининг расмий вакиллари актриса ҳеч қачон пластик жарроҳлик амалиётларидан фойдаланмаганини айтишган. Шридеви миллий либослар, анъанавий тақинчоқларни яхши кўрган ва умрининг охиригача Болливуд гўзалларининг ҳақиқий тимсоли бўлиб қолган.
Шридевининг шахсий ҳаётида ҳам барчаси аъло даражада эди – ҳар қалай ташқаридан шундай кўринарди. У таниқли продюсер Бони Капур билан оила қуриб, икки нафар қиз фарзандни дунёга келтирди. Оиласига кўпроқ вақт ажратиш мақсадида ижодда бир муддат танаффус қилди: 1997 йилдан кейин 15 йил мобайнида бирорта ҳам фильмда рол ижро этмади. Аммо ижодий танаффус актрисанинг машҳурлигига заррача таъсир кўрсатмади.
2015 йилда Болливуд юлдузи ўзининг 300-фильми – “Она” картинасида бош ролни ижро этди. Шундан кейин фильмларга продюсерлик қилиш билан шуғулланди, фақатгина рол ижро этиш билан чекланмай, фильмлар суратга олиш нияти борлигини ҳам маълум қилди.
Бироқ актриса эзгу орзуларини рўёбга чиқара олмади. 2018 йили жиянининг Дубай шаҳрида ўтказилган тўй маросимига ташриф буюрган актриса дўконларни кўздан кечириш учун яна бир неча кун БААда қолишга қарор қилди ва тез орада... хонасидаги ҳаммомдан сувга чўккан ҳолда топилди. Экспертиза текшируви актрисанинг қонида алкогол бўлганини аниқлади. Ушбу маълумот Шридевининг яқинларини ҳам, унга меҳр қўйган мухлисларни ҳам ҳайратга солди – актриса ҳар доим одоб-ахлоқ қоидаларини маҳкам тутар, ҳеч қачон спиртли ичимликлар истеъмол қилмасди.
Тергов аниқ хулоса тақдим эта олмади ва бир неча бор қайта тикланди. Шридевининг яқинлари ҳалигача унинг ўлими бахтсиз ҳодиса бўлганига ишонмайди. Оммавий ахборот воситалари эса ижодкор турмуш ўртоғи томонидан ўлдирилган деган тахминни илгари суришди. Бунга Бони Капурнинг сўнгги кунларда ўзини шубҳали тутгани сабаб бўлди: у ҳар доим саёҳатларга рафиқаси билан бирга борган, аммо бу сафар тўй маросимига келмаган. Бахтсиз ҳодиса содир бўлишидан аввал эса кутилмаганда Дубайда пайдо бўлиб қолган. Актрисанинг жонсиз танасини ваннахонадан топган ҳам Бони Капур эди – у рафиқаси ҳаммомга кириб кетганда телевизорда крикет томоша қилган, қимматли вақтни бой берган ва ҳеч нарсани эшитмаган.
Тергов актрисанинг куч ишлатиш натижасида ўлдирилгани ҳақидаги версияни рад этди, Бони Капурга қарши айблов эълон қилинмади. Тергов ишлари бугунги кунга қадар давом этмоқда, аммо анчадан бери ишга доир янги маълумот эълон қилинмади. Актрисанинг сирли ўлими сабаби ҳали бери топилмаса ҳам керак...
Изоҳ (0)