“Яна 100 нафар бола ҳалок бўлиши мумкин эди” — Амрилло Иноятов “Док-1 Макс” воқеасига изоҳ берди

Олий Мажлис Қонунчилик палатасида 14 ноябрь куни бўлиб ўтган навбатдаги мажлисда соғлиқни сақлаш вазири Амрилло Иноятов ҳисобот бериб, “Док-1 Макс” воқеасига тўхталиб ўтди.

“Док-1 Макс” билан боғлиқ суд ишида вазирга воқеалар содир бўлишидан аввал болаларда буйрак етишмовчилиги кузатилгани ҳақидаги маълумот берилгани, аммо вазиргача етиб бормагани айтилган. Судда ушбу ҳолатга жавоб қайтарган вазир ўринбосари Элмира Боситхонова гувоҳнинг бу гапини инкор қилганди.

“Ўша вақтда мен вазирнинг биринчи ўринбосари бўлганман. Биринчи ўринбосар бўла туриб, хабарни кеч эшитганман. Буни очиқ тан олиб айтяпман.

Ўтган йилнинг 23—24 декабрь кунлари воқеани эшитиб, дарҳол шуғулланганман. 2023 йилнинг 10 январига қадар 17 минг нафар ҳамшира ва бригадаларимиз хонадонма-хонадон юриб, сироп ва препаратларни йиғиб олди.

Ўша вақтда президентимиз топшириғига кўра ҳуқуқни муҳофаза қилувчи идора вакиллари ҳам ушбу масалада иш бошлаган эди. Идора ходимлари барча дорихоналарни инвентаризация қилиб, сиропларни йиғиштириб олди, биз эса хонадонлардан йиғдик. Ҳолат биттада тўхтатилди”, — деди Амрилло Иноятов.

Унинг қўшимча қилишича, 100 нафарга яқин болани ҳудудлардан йиғиб олиб келиб, Болалар миллий марказига ва Республика шошилинч тез тиббий ёрдам марказига жойлаштирилган.

“Самарқанд вилоятидаги бош шифокор масалани кўтариб, бу препаратдан экани ҳақидаги ахборот бизга етиб келгунга қадар шифокорларимиз бошқа касаллик бўйича ташхис қўйиб ишлашган.

Одатда болаларда ўткир буйрак етишмовчилиги грипп ва ўткир ичак касалликларини асорати сифатида келади. Бемор болалар шунга мос равишда протокол бўйича даволаган. Шифокорларимиз препаратдан заҳарланиш бўлганини билмаган. Агар билганида ёндашув мутлақо бошқача бўлиб, ҳар бир болани ҳаётини сақлаб қолиш мумкин эди”, — деди соғлиқни сақлаш вазири.

Палата мажлисида депутат Дониёр Ғаниев “Док-1 Макс” воқеасидан кейин сиёсий жавобгарлик кўрмаётганини айтган эди. Бунга жавобан вазир Амрилло Иноятов депутатнинг эътирозларини 100 фоиз қабул қилиши ва бирор баҳона қилишга асоси йўқлигини билдирган.

Аввалроқ “Болаларга йод дозадан ортиқ берилган” — Амрилло Иноятов “Антиструмин” воқеаси юзасидан изоҳ берганди.