Таниқли хонанда ва актриса Азиза Низомова YashinTV YouTube каналига берган интервьюсида мухлисларини қизиқтирган кўплаб саволларга жавоб берди. Қуйида интервьюдаги айрим қизиқарли савол-жавоблар келтирилади.
— Юристлар оиласидан чиққан Азиза Низомова нима учун санъат йўлини танлади?
— Ота-онам ўзлари юрист бўлишига қарамай мени доим қўллаб-қувватлаган. Бизнинг уйимизда фарзандларга нисбатан ҳеч қандай тақиқлар бўлмаган. Санъатга қизиқишим баланд бўлгани учун шу йўлдан кетганман.
— Турмуш ўртоғингиз билан қандай танишгансиз?
— Турмуш ўртоғим билан тўйда танишганмиз. Улар дўстларининг тўйларига келганлар. Мен эса ўша ресторанда қўшиқ куйлаётган эдим. Танишганимиздан 4-5 ой ўтиб турмуш қурганмиз. Улар мендан пасспортда бир ёш катта бўлсалар ҳам, ақл жиҳатдан анча етуклар. Кўп китоб ўқиганлари боис улар билан суҳбатлашиш жуда мароқли.
— Онангиз ҳақида кўп гапирасиз-у, негадир отангиз ҳақида гапирмайсиз?
—Отам жуда ҳам яхши инсон. Ўзбекистонда хизмат кўрсатган юрист. Ўз вақтида отам адлия вазири бўлганлар. Жуда ҳам кўп китоб ўқиганлар. Уйимизда ҳалигача катта кутубхона бор.
— Муяссар Раззоқова сизга ким бўлади?
— Муяссар опа отамнинг сингиллари. Жуда ҳам яхши аёл. Ёшлигимдан уйимизга келиб, менга фортепиано чалишни ўргатардилар.
— Бир ойлик даромадингиз ва харажатларингиз?
— Битта сериалда бир кун ишлашим учун 1 миллион сўм сўрайман. Instagram’даги 1 дақиқалик Stories’им 600 АҚШ доллар. Лекин камдан-кам реклама оламан. Дуч келган нарсани кузатувчиларимга тавсия қилавермайман. Аммо шуни айтишим мумкинки, харажатим даромадимдан кўпроқ. Шу сабаб сўнгги пайтларда тежамкор бўлишни ўрганяпман.
— Нима учун охирги пайтларда кам куйлаяпсиз?
— Хонандалик шундай касбки, доим бир оз танаффус қилиб туриш керак. Чунки ҳаддан ташқари узоқ вақт бир соҳада ишласангиз, илҳомингиз кетиб қолади. Ҳозир кўп танишларимда шундай ҳолат кузатилмоқда. Шунинг учун ҳам ижодкорлар ўзи учун танаффус олиб туриши керак.
Изоҳ (0)