Қашқадарёда хусусий университетга 3-курсдан ўқишга киритишни ваъда қилган шахс ушланди 

Қашқадарё вилоятида пул эвазига ўқишга киритиб қўйишни ваъда қилган шахслар қўлга олинди, деб хабар беради Бош прокуратура ҳузуридаги департамент.

Қайд этилишича, департаментнинг Қашқадарё вилоят бошқармаси томонидан тезкор тадбир ўтказилган. Тадбирда Б.Х. исмли шахс фуқаро Э.А.нинг ишончига кириб, уни танишлари ёрдамида Қарши шаҳридаги Иқтисодиёт ва педагогика нодавлат университетининг “Бошланғич таълим” йўналишига 3-босқичдан ўқишга киритиб қўйиш эвазига 900 долларни олган вақтида ашёвий далиллар билан ушланган.

Шу каби, департамент ҳамда ДХХнинг Қашқадарё вилояти бошқармалари томонидан ўтказилган тезкор тадбирда З.С. исмли шахс фуқаро Э.А.нинг ишончига кириб, уни юқори лавозимда ишловчи танишлари ёрдамида Қарши шаҳридаги Абу Али ибн Сино номидаги жамоат саломатлиги техникумига ўқишга киритиб қўйиш эвазига 800 долларни олган вақтида ашёвий далиллар билан ушланган.

Мазкур ҳолатлар юзасидан Жиноят кодексининг 168-моддаси (Фирибгарлик) ва 28, 211-моддаси (Пора бериш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.