Сурхондарё вилоятининг Сариосиё туманидаги Тўполанг сув омбори юқори қисмидан янги кўмир конини ўзлаштириш бошланди.
Қайд этилишича, мамлакатда ҳозирги кунда 44 та йирик кўмир кони мавжуд. Улар қаторига Ангрен, Шарғун ва Бойсун конлари ҳам киради.
Тўполанг кўмир кони ҳавзаси денгиз сатҳидан 1450 метр баландликда жойлашган. Айни пайтда кўмир конидан истеъмолчиларга 35 минг тонна кўмир захираси қазиб олиниб, етказиб беришга тайёрлаб қўйилган.
Кўмир конида ишларни жадаллаштириш учун 15 дан ортиқ техникалар жалб этилиб, ҳар куни кўмир ташиш 1000-1200 тоннагача олиб борилмоқда. Тўполанг кўмир конида ҳозирча аниқланган кўмир захираси ҳажми 11 миллион тонна.
“Қазиб олинаётган маҳсулот, энг аввало, ижтимоий ҳимояга муҳтож бўлган аҳоли вакилларига тарқатилмоқда. Манзилли рўйхат асосида қўшимча 20 минг тонна кўмир етказиб берилиши белгиланган”, — дейилади хабарда.
“Ўзгидроэнерго”га кўра, бугунги кунда Сариосиё ва Узун туманлари аҳолиси учун кўмир маҳсулотлари етказиб бериш режасига мувофиқ, тўлиқ таъминланган. Денов ва бошқа туманларга жорий ойнинг охиригача тўлиқ етказиб берилади.
Кўмирнинг аҳоли хонадонларига манзилли етиб бориши учун Денов, Сариосиё ва Узун туманларида 11 минг 441 нафар “темир дафтар” ва “аёллар дафтари”даги ижтимоий ёрдамга муҳтож фуқаролар рўйхати шакллантирилган.
Ҳозирги кунда Тўполанг кўмир кони ҳавзасида кўчкилар билан боғлиқ хавфсизликни таъминлаш, маҳсулот қазиб олиш жараёнида кўмир қатлами ётқизимларига аниқлик киритиш ва янги конларни ўзлаштириш ишлари давом эттирилмоқда.
Аввалроқ Европа фойдаланилмаётган кўмир учун Осиёдан харидор қидира бошлагани ҳақида хабар берилганди. Июнда эса Қозоғистон Ўзбекистонга кўмир экспортини босқичма-босқич 25 мартагача ошириши маълум бўлган эди.
Изоҳ (0)