Қалқонсимон без – таркибида ёд мавжуд бўлган гормонларни ишлаб чиқарувчи ички секреция бези. У бутун организмни назорат қилувчи гормонларнинг ҳосил бўлиши ҳамда ишлаб чиқарилиши учун масъул ҳисобланади. Америка қалқонсимон без ассосиацияси маълумотларига кўра, у ҳаддан ташқари фаол ёки аксинча, ўта суст ишлаши мумкин. Статистик маълумотлар ушбу аъзо билан боғлиқ касалликлар эркакларга нисбатан аёлларда кўпроқ учрашини тасдиқлайди.
Агар организмингизда қалқонсимон без гормонлари ҳаддан ташқари кўп ишлаб чиқарилаётган бўлса, сизда гипертиреоз, гормонлар миқдори ўта кам бўлса, гипотиреоз ҳолати кузатилади. Гормонлар миқдорининг меъёридан камлиги ҳам, кўплиги ҳам бутун организмга таъсир қилмасдан қолмайди. Биз бугун ушбу гормонларнинг сочларга қандай таъсир қилишини кўриб чиқамиз.
Сочлардаги қуруқлик, дағаллик ва синувчанлик қалқонсимон без касалликлари белгиси бўлиши мумкин.
Ёки аксинча:
Гипертиреоз баъзида сочларингизнинг ҳаддан ташқари майин ва ингичка бўлиб кетишига ҳам олиб келади.
“Healthline” экспертлари буни сочлар учун Т3 ва Т4 гормонлари жавоб бериши билан изоҳлайдилар. Ушбу гормонлар миқдори меъёрдан кўпайиб ёки камайиб кетса, қон томирлари орқали озиқланадиган соч фолликулалари илдизидан янги сочлар чиқа бошлайди. Бироқ қалқонсимон без касаллиги туфайли жараён бутунлай ўзгариб кетади.
Бош терисининг маълум соҳаларидаги соч толаларининг ҳаддан ташқари кўп ва тез тўкилиши гормонлар билан боғлиқ муаммолардан дарак беради.
Буюк Британия қалқонсимон без фонди вакиллари бу борада шундай дейдилар: “Алопеция одатда терининг алоҳида қисмлари, кўп ҳолларда айлана шаклидаги соҳада калликни келтириб чиқаради. Бу ҳолат вақтинчалик бўлса-да, афсуски сочларнинг сезиларли даражада тўкилишига олиб келади”.
Гипер ва гипотиреозга олиб келувчи омилларнинг ҳаддан ташқари кўп эканлигини ҳисобга олган ҳолда сочларингиз одатдагидан тез тўкила бошлаганини пайқаганингиз заҳоти эндокринологга мурожаат қилишни тавсия этамиз.
Изоҳ (0)