ЮНИСЕФнинг Ўзбекистондаги ваколатхонаси раҳбари Мунир Мамедзаде ўз миссиясини якунламоқда. Саида Мирзиёева 8 ноябрь куни у билан учрашиб, БМТ Болалар жамғармаси билан ҳамкорликдаги қўшма лойиҳалар боришини атрофлича муҳокама қилди.
“Биз 2021−2025 йилларга мўлжалланган мамлакат ҳамкорлик дастурини Ўзбекистонда амалга ошириш бўйича жамғарма билан ҳамкорликдаги қўшма лойиҳаларнинг боришини атрофлича муҳокама қилдик”, — деб ёзди ўз саҳифасида.
Қайд этилишича, суҳбат давомида болаларни ижтимоий ҳимоя қилишни қўллаб-қувватлаш, оналар ва болалар саломатлигини муҳофаза қилиш ва мустаҳкамлаш, таълим тизимини такомиллаштириш, сифатли тиббий хизматлардан фойдаланиш имкониятларини кенгайтиришга қаратилган муносабатларни янада ривожлантириш юзасидан фикр алмашилди.
Бундан бир кун аввал ТИВ раҳбари Бахтиёр Саидов ҳам Мунир Мамедзаде билан учрашганди. Вазир Мамедзаде ва унинг жамоасига самарали фаолият ва Ўзбекистонда аҳоли учун энг қулай шарт-шароитларни яратиш, айниқса, болалар салоҳиятини рўёбга чиқаришга қаратилган ислоҳотларни қўллаб-қувватлагани учун миннатдорчилик билдирганди.
Мунир Мамедзаде ЮНИСЕФнинг Ўзбекистондаги ваколатхонаси раҳбари лавозимида иш фаолиятини 2020 йилнинг август ойида бошлаганди. У ЮНИСЕФнинг Озарбайжон, Молдова, Непалдаги ваколатхоналарида, шунингдек Европа ва Марказий Осиё мамлакатлари бўйича минтақавий ваколатхонасида ҳам ишлаган.
Изоҳ (0)