Исроилнинг собиқ хавфсизлик хизмати бошлиғи Яаков Пери Ғазодаги операция яна бир неча ҳафта давом этишини айтди. Бу ҳақда у Bild нашрига берган интервьюсида маълум қилди.
Яаков Пери олти йил давомида “Шабак” умумий хавфсизлик хизматига раҳбарлик қилган. Интервьюда у Ғазода гаровга олинганлар, разведканинг ишлаш тартиби ва уруш қачонгача давом этиши ҳақида гапирди.
“Одатда ҲАМАС гаровга олинганларга ғамхўрлик қилади, чунки улардан восита сифатида фойдаланади. Умид қиламизки, бу сафар ҳам улар гаровга олинганларга тегишли тарзда ғамхўрлик қилмоқда. Аммо биз буни аниқ билмаймиз”, — деди Пери.
У Исроилнинг секторда фаолият олиб борувчи разведка ходимлари борлигини, уларга махсус вазифа юкланганини айтди.
“Ғазо секторида разведка тармоғи мавжуд, биз маълумот тўплайдиган барча турдаги техник воситаларга эгамиз. Исроил разведкаси бизнинг агентларимизга топширган вазифалардан бири гаровга олинганларнинг қаердалигини аниқлаш эди. Умид қиламанки, Исроил разведкаси бу жойларни топади”, — таъкидлади у.
Яаков Пери Фаластиннинг ҲАМАС гуруҳи 7 октябрда Исроилга қарши ҳужум бошлаганини разведка олдиндан билмаганини тан олди ва буни муваффақиятсизлик деб атади.
“Афсуски, биз барча жабҳаларда, ҳам разведка, ҳам операсияда муваффақиятсизликка учрадик. Биз ҳайратда қолгандик ва ҳужумга тайёр эмас эдик. Бу Исроил разведкаси Ғазо секторида нималар бўлаётганини билмайди, дегани эмас. Лекин разведка маълумотларида ҲАМАСнинг ҳаракатлари бизга ҳеч қандай алоқаси йўқлиги келтирилган”.
Исроил собиқ хавфсизлик хизмати раҳбари уруш қанча давом этишини ҳам прогноз қилди.
“Менимча, ҳарбий операцияни якунлаш учун бизга яна бир неча ҳафта керак. Кейин янги режим яратиш учун бир неча ой вақтимиз бўлади. Бу ё Фаластин маъмуриятидан, менимча, унчалик яхши фикр эмас, ёки араб давлатлари тўртлигидан, қандайдир халқаро кучдан иборат бўлади”, — дея хулоса қилди у.
Изоҳ (0)