“Ташаббусли бюджет”да 1,5 мингдан ортиқ овоз тўплаган, лекин ғолиб деб топилмаган лойиҳалар таҳлиллари асосида маблағ ажратиш режалаштирилмоқда. Бу ҳақда Иқтисодиёт ва молия вазирлиги томонидан эълон қилинган 2024—2026 йиллар учун Бюджетномада келтирилган.
Унга кўра, “Очиқ бюджет” ахборот порталига 2023 йилда келиб тушган ва ҳар бири 1,5 мингдан ортиқ овоз тўплаган, лекин ғолиб деб топилмаган лойиҳалар таҳлиллари асосида жиҳозлаш билан боғлиқ лойиҳаларни амалга ошириш харажатларига 2024 йил давлат бюджети лойиҳасида маблағлар ажратиш кўзда тутилган.
Ташаббусли бюджетлаштириш жараёнларини янада такомиллаштириш, жойларда кузатилаётган айрим камчиликларни бартараф этиш мақсадида амалдаги тартибга тегишли ўзгартириш ва қўшимчалар киритиш орқали овоз беришда фуқароларни идентификация қилиш механизмини жорий этиш таклиф этилмоқда.
Бюджетномада қайд этилишича, келгуси йилдан бошлаб мазкур жараёнларни янада кенгайтириш ҳамда такомиллаштириш бўйича давлат дастурлари, қарор ва фармойишларда бир қатор вазифалар белгилаб берилди.
Хусусан:
- ташаббусли бюджетлаштириш амалиётини кенгайтириш соҳасида: туман (шаҳар) бюджетларида кўзда тутилган ички йўлларни таъмирлаш учун ажратилган маблағлар тўлиқ “Менинг йўлим” лойиҳаси доирасида фуқароларнинг ташаббуслари асосида йўналтирилиши ҳамда ушбу мақсадларда 2024 йилда 800 миллиард сўм маблағ йўналтирилиши белгиланди;
- маҳаллаларнинг молиявий мустақиллигини ошириш ва маҳаллалардаги йирик бўлмаган лойиҳаларни амалга ошириш ҳамда муаммоларни мустақил ҳал этишни ташкил этиш мақсадида “Маҳалла бюджети” тизими жорий этилмоқда.
2021—2023 йиллар давомида “Ташаббусли бюджет” жараёнлари учун давлат бюджетидан қарийб 8 триллион сўм маблағлар йўналтирилди. Мазкур маблағлар доирасида жами ўн минга яқин лойиҳалар ғолиб деб топилиб, беш мингдан ортиқ маҳаллаларда ижтимоий муаммолар бартараф этилишига эришилди.
Изоҳ (0)