“Tashabbusli budjet”da 1,5 mingdan ortiq ovoz to‘plagan, lekin g‘olib deb topilmagan loyihalar tahlillari asosida mablag‘ ajratish rejalashtirilmoqda. Bu haqda Iqtisodiyot va moliya vazirligi tomonidan e’lon qilingan 2024—2026-yillar uchun Budjetnomada keltirilgan.
Unga ko‘ra, “Ochiq budjet” axborot portaliga 2023-yilda kelib tushgan va har biri 1,5 mingdan ortiq ovoz to‘plagan, lekin g‘olib deb topilmagan loyihalar tahlillari asosida jihozlash bilan bog‘liq loyihalarni amalga oshirish xarajatlariga 2024-yil davlat budjeti loyihasida mablag‘lar ajratish ko‘zda tutilgan.
Tashabbusli budjetlashtirish jarayonlarini yanada takomillashtirish, joylarda kuzatilayotgan ayrim kamchiliklarni bartaraf etish maqsadida amaldagi tartibga tegishli o‘zgartirish va qo‘shimchalar kiritish orqali ovoz berishda fuqarolarni identifikatsiya qilish mexanizmini joriy etish taklif etilmoqda.
Budjetnomada qayd etilishicha, kelgusi yildan boshlab mazkur jarayonlarni yanada kengaytirish hamda takomillashtirish bo‘yicha davlat dasturlari, qaror va farmoyishlarda bir qator vazifalar belgilab berildi.
Xususan:
- tashabbusli byudjetlashtirish amaliyotini kengaytirish sohasida: tuman (shahar) byudjetlarida ko‘zda tutilgan ichki yo‘llarni ta’mirlash uchun ajratilgan mablag‘lar to‘liq “Mening yo‘lim” loyihasi doirasida fuqarolarning tashabbuslari asosida yo‘naltirilishi hamda ushbu maqsadlarda 2024-yilda 800 milliard so‘m mablag‘ yo‘naltirilishi belgilandi;
- mahallalarning moliyaviy mustaqilligini oshirish va mahallalardagi yirik bo‘lmagan loyihalarni amalga oshirish hamda muammolarni mustaqil hal etishni tashkil etish maqsadida “Mahalla budjeti” tizimi joriy etilmoqda.
2021—2023-yillar davomida “Tashabbusli budjet” jarayonlari uchun davlat budjetidan qariyb 8 trillion so‘m mablag‘lar yo‘naltirildi. Mazkur mablag‘lar doirasida jami o‘n minga yaqin loyihalar g‘olib deb topilib, besh mingdan ortiq mahallalarda ijtimoiy muammolar bartaraf etilishiga erishildi.
Izoh (0)