Бухоро вилояти Пешку туманида газдан ноқонуний фойдаланган тадбиркор 7,5 млн сўм жаримага тортилди. Бу ҳақда “Ҳудудгазтаъминот” АЖ ахборот хизмати хабар берди.
Хабарга кўра, “Ҳудудгаз Бухоро” газ таъминоти филиалининг Моддий ресурслардан оқилона фойдаланиш ва коррупцияга қарши сиёсатни амалга ошириш бўлими ҳамда “Пешкутумангаз” газ таъминоти бўлими ходимлари билан ҳамкорликда туман ҳудудида табиий газдан фойдаланиш ҳолатлари ўрганилди.
Ўрганишлар давомида туманнинг “Чикирчи” маҳалласидаги якка тартибдаги тадбиркор О.Ж.га қарашли бўлган умумий овқатланиш корхонасига ўрнатилган электрон газ ҳисоблаш ускунасидан олдин сўрғич улаб, табиий газдан 5043 метр куб ноқонуний фойдаланилгани аниқланди ва истеъмолчи 7 млн 560 минг сўм миқдорида жаримага тортилди.
Таъкидланишича, вилоят бўйича ўтган октябрь ойи давомида олиб борилган ўрганишларда 58 та табиий газдан ноқонуний фойдаланганлик ва 40 та қоидабузарликлар аниқланган. Ноқонуний фойдаланган, қоидабузарликни содир этган истеъмолчиларга нисбатан умумий миқдорда 324,9 млн сўм жарима қўлланган. Ҳар бир аниқланган ҳолатлар юзасидан далолатнома расмийлаштирилиб, тегишли тартибда чора кўриш мақсадида ҳуқуқ-тартибот органларига тақдим қилинмоқда.
Изоҳ (0)