Ўзбекистонда сентябр ойида айрим истеъмолчиларнинг электр энергияси ва табиий газдан ноқонуний фойдаланишлари натижасида тизимга 111 миллиард 428 миллион сўм зарар етказилди. Бу ҳақда Энергетика вазирлиги матбуот хизмати хабар берди.

Маълум қилинишича, “Ўзэнергоинспекция” томонидан ҳуқуқни муҳофаза қилувчи органлар ва электр ҳамда газ таъминоти корхоналари мутахассислари билан ҳамкорликда сентябр ойида ўтказилган назорат тадбирларида 911 та ҳолатда истеъмолчилар томонидан табиий газ ва электр энергиясидан ноқонуний фойдаланиш ҳолатлари аниқланган.

Бунда 94 миллион 533 минг метр куб табиий газ (91 миллиард 57 миллион сўм) ва 42 миллион 961 минг кВт/соат электр энергияси (20 миллиард 371 миллион сўм) талон-торож қилиниши натижасида тизимга келтирилган жами 111 миллиард 428 миллион сўм зарар ундиришга қаратилган.

Ноқонуний фойдаланиш ҳолатларининг энг кўпи — Самарқанд, Фарғона ва Тошкент вилоятлари ҳиссасига тўғри келади.

Ушбу ҳажмдаги табиий газ ҳозирги кунда 472 минг 665 та хонадоннинг, электр энергияси эса 214 минг 805 та хонадоннинг бир ойлик истеъмолига тенгдир.

Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинган.

Аввалроқ Жиззах шаҳридаги МЧЖ 3 млрд 840 млн сўм ёки 19 200 та хонадоннинг бир ойлик истеъмолига тенг миқдордаги табиий газдан ноқонуний фойдалангани аниқланганди. Шунингдек, Тошкентда салкам 530 млн сўмлик газдан ноқонуний фойдаланилгани, Ўзбекистонда бир ойда электр ва газдан ноқонуний фойдаланиш оқибатида тизимга қанча зарар етгани тўғрисида хабар берилган эди.