Электр, иссиқлик энергияси, газдан фойдаланиш қоидаларини бузиш билан боғлиқ ҳуқуқбузарликлар тўғрисидаги фотосуратлар ва видеоёзувларни қабул қилиш, кўриб чиқиш ҳамда уларни тақдим этган шахсларни рағбатлантириш тартиби ҳақидаги низомни тасдиқлаш тўғрисида Вазирлар Маҳкамаси қарори эълон қилинди.
Президентнинг 2023 йил 24 майдаги фармонида электр, иссиқлик энергияси, газдан фойдаланиш қоидаларини бузиш билан боғлиқ ҳуқуқбузарликлар ҳақида хабар берган шахсларни пул мукофоти билан рағбатлантириш тартибини ишлаб чиқиш белгиланганди.
Шунга кўра, ёқилғи-энергия ресурсларини талон-торож қилишнинг олдини олиш ҳамда улардан оқилона фойдаланиш соҳасида жамоатчилик назоратини ўрнатишга қаратилган Uzenergо мобил иловаси 1 ноябргача ишлаб чиқилади.
Ҳуқуқбузарлик ҳолатлари тўғрисидаги видеоёзувларни тақдим этган шахслар тўғрисидаги маълумотлар ошкор этилишига йўл қўйилмайди ва уларга мурожаати натижалари юзасидан маълумотлар юборилади.
Жисмоний шахсларнинг видеотехника воситалари орқали қайд этилган ҳуқуқбузарлик ҳолатлари бўйича ҳуқуқбузарлардан ундирилган жарималар қуйидагиларга йўналтирилади:
- “Ўзэнергоинспекция” ҳисобварағига — ундирилган сумманинг 50 фоизи;
- Тегишлилиги бўйича электр ва иссиқлик энергияси ҳамда табиий газ таъминоти корхоналари ҳисобварақларига — ундирилган сумманинг 50 фоизи.
Шунингдек, 2023 йил 1 декабргача ҳуқуқбузарлик ҳолатлари, шу жумладан, табиий газдан фойдаланиш қоидаларини мунтазам равишда қасддан бузган истеъмолчиларнинг ягона электрон реестри жорий этилади.
Бунда мазкур реестр Энергетика вазирлиги томонидан юритилади ҳамда унга киритилган маълумотлардан манфаатдор вазирликлар ва идоралар хавфларни баҳолаш мезони сифатида фойдаланади.
2023 йил декабргача “Ўзэнергоинспекция”нинг масъул ходимлари техник воситалар, зарур ускуналар (планшет ва бошқалар) билан таъминланиб, Uzenergo мобил иловасининг тўлиқ ишлаши учун сервер ускуналари харид қилинади.
Ушбу чора-тадбирларни амалга ошириш билан боғлиқ харажатлар Энергетика вазирлиги ва “Ўзэнергоинспекция”нинг бюджетдан ташқари маблағлари ҳамда донор мамлакатлар кредитлари ва грантлари, шунингдек, қонунчиликда тақиқланмаган бошқа манбалар ҳисобидан амалга оширилади.
Изоҳ (0)