Тошкент халқаро аэропортининг учиб келиш ҳудудида кутиб олувчилар учун павильон қурилиши якунланди, деб хабар беради Uzbekistan Airports матбуот хизмати.
Қайд этилишича, умумий майдони 500 квадрат метр бўлган алоҳида павильон халқаро аэропортнинг учиб келиш зали ёнидаги P2 автотураргоҳида жойлашган. Ушбу павильонда кутиб олувчилар учун ўриндиқлар мавжуд бўлиб, яқин кунларда кафе ва гул дўкони очилади ҳамда савдо автоматлари, банкоматлар, мобил қурилмалар учун зарядлаш пунктлари ўрнатилади.
“Қурилган павильон вақтинчалик ечим ҳисобланади. Айни пайтда мавжуд терминални кенгайтириш лойиҳасини ишлаб чиқиш якуний босқичда бўлиб, у ерда кутиб олувчи ва кузатувчилар учун барча шароитлар яратилади”, — дейилади хабарда.
Аввалроқ Тошкент аэропорти йўл ўтказгичи (эстакада)даги камералар жарима сола бошлаши тўғрисида хабар берилганди. Йўл ўтказгичга ўрнатилган йўл камералари эндиликда ЙҲХБ тизимлари билан интеграциялашган.
Изоҳ (0)