Сурхондарё вилояти Денов туманида археология ёдгорлиги фуқарога боғдорчилик учун бериб юборилгани аниқланди. Бу ҳақда Бош прокуратура ахборот хизмати хабар берди.
Унга кўра, Прокуратура органлари томонидан Маданий мерос агентлиги билан ҳамкорликда тарихий ёдгорликларни муҳофаза қилиш ва сақлашга қаратилган тизимли назорат тадбирлари ўтказиб келинмоқда. Шундай тадбирларнинг бирида Денов тумани фермер хўжаликларига ер участкаларини бериш масалаларини кўриб чиқувчи комиссия томонидан “Қорахон” маҳалласида жойлашган I-ХII асрларга оид “Марказтепа” археология ёдгорлиги (0,21 га) қонунчилик талабларига зид равишда боғдорчилик учун фуқаро М.А.га берилгани аниқланди.
Оқибатда фуқаро М.А. томонидан ушбу тарихий ёдгорликнинг 630 метр куб ҳажмдаги ҳудуди бузиб ташланиб, объектга жуда кўп миқдорда — 13 миллиард сўм зарар етказилган. Текшириш натижасига кўра, тегишли мансабдор шахслар ва бошқаларга нисбатан жиноят иши қўзғатилиб, тергов ҳаракатлари олиб борилмоқда.
Мазкур жиноий қилмишлар қонунчиликка киритилган ўзгартиришларга асосан оғир жиноятлар тоифасига ўтказилган ва айбдор шахсларга 7 йилгача озодликдан маҳрум қилиш жазоси қўлланади.
Изоҳ (0)