Франция Республикаси президенти Эммануэл Макроннинг расмий ташрифи доирасида Самарқанд шаҳрида ўтаётган Ўзбекистон—Франция бизнес форумида Ўзбекистон Республикаси президенти Шавкат Мирзиёев Orano компанияси раиси Клод Имовен билан учрашди.
Orano — уран ва ядро ёқилғисини ишлаб чиқариш бўйича дунёнинг йирик компанияси, активлари қиймати 29 миллиард евродан ортиқни ташкил этади.
Учрашувда геология-қидирув ишлари ва уран қазиб чиқариш борасидаги ҳамкорликни кенгайтириш бўйича ташаббуслар қўллаб-қувватланди.
Шунингдек, Шавкат Мирзиёев Самарқандда бизнес форуми доирасида EDF компанияси раиси ва бош директори Люк Ремон билан учрашув ўтказди.
EDF дунёдаги атом электр станцияларини бошқариш бўйича энг йирик компания бўлиб, активлари қиймати 427 миллиард долларни ташкил этади. Электр энергиясини ишлаб чиқариш, узатиш ва тарқатиш билан шуғулланади.
Суҳбатда президент компаниянинг Сирдарё ва Сурхондарёдаги буғ-газ электр станцияларини қуришда иштирок этаётганини қўллаб-қувватлади, лойиҳаларни амалга оширишни жадаллаштириш муҳимлигини таъкидлади.
Бундан ташқари, Шавкат Мирзиёев Ўзбекистон—Франция бизнес форуми доирасида Семмарис компанияси раиси Стефан Лаяни билан учрашди.
Компания йиллик айланмаси 9 миллиард евро бўлган дунёдаги энг катта озиқ-овқат логистика марказининг эгасидир. Бутун жаҳон бўйлаб самарали улгуржи озиқ-овқат бозорларини қуриш ва бошқаришда илғор тажриба тўплаган.
Давлат раҳбари компаниянинг Самарқанд, Андижон ва Тошкент вилоятларида агрологистика мажмуаларини қуриш борасидаги режаларини қўллаб-қувватлади.
Ўзбекистон президенти бизнес форуми доирасида Франциянинг Meridiame компанияси раиси Терри До билан ҳам учрашди.
Компания Европа, Шимолий Америка ва Африкада инфратузилма соҳасида инвестиция лойиҳаларини амалга ошириш билан шуғулланади. Ўн битта мамлакатда офисларига эга. Активлари — 18 миллиард евро.
Учрашувда компаниянинг “Янги Тошкент”ни барпо этиш доирасида инфратузилмавий лойиҳаларни амалга ошириш истиқболлари муҳокама қилинди.
Шунингдек, Самарқанддаги бизнес форумида Шавкат Мирзиёев Франциянинг Lactalis компанияси раиси Эммануэл Бене билан учрашди.
Компания дунёдаги сут ва пишлоқ маҳсулотларининг энг йирик ишлаб чиқарувчисидир. Унинг тасарруфида 52 та мамлакатдаги 270 та завод фаолият юритмоқда.
Учрашув чоғида давлат раҳбари компаниянинг Наманганда сут маҳсулотларини ишлаб чиқаришни йўлга қўйиш борасидаги режаларини қўллаб-қувватлади.
Шавкат Мирзиёев Ўзбекистон-Франция бизнес форуми доирасида “Боэҳрингер Ингелҳеим” компанияси раиси Кристиан Вижсен билан ҳам учрашув ўтказди.
Компания био- ва онкологик препаратларни шартнома асосида ишлаб чиқиш ва ишлаб чиқариш бўйича хизматлар кўрсатувчи компанияларнинг етакчи йигирматалигига киради.
Учрашув чоғида биргаликда онкологик дори воситаларини ишлаб чиқаришни ташкил этиш истиқболлари кўриб чиқилди.
Изоҳ (0)