Владимир Путин “Валдай” дискуссия клуби йиғилишида “Вагнер” хусусий ҳарбий компанияси асосчиси Евгений Пригожин ва Тверь вилоятидаги авиаҳалокатда қурбон бўлган бошқа одамларнинг жасадларида граната парчалари топилганини айтди. Унинг сўзларига кўра, самолёт ҳалокатига ҳеч қандай ташқи таъсир сабаб бўлмаган.
“(Хусусий ҳарбий) компания раҳбариятига нима бўлди, деган савол ҳавода муаллақ турибди. Тергов қўмитаси раҳбари менга авиаҳалокатда қурбон бўлганларнинг жасадларидан қўл гранаталари бўлаклари топилгани ҳақида хабар берди. Самолётга ҳеч қандай ташқи таъсир кўрсатилмаган. Бу аллақачон тасдиқланган факт – Россия Федерацияси Тергов қўмитаси томонидан ўтказилган экспертиза натижалари”, — деди Путин.
Президент Пригожиннинг шахсий самолёти ҳалокати бўйича тергов ҳали якунланмаганини таъкидлади. Унинг сўзларига кўра, қурбонларнинг қонида алкогол ёки гиёҳванд моддалар бор-йўқлиги бўйича экспертиза ўтказилмаган, бироқ Путиннинг фикрича, буни ўтказиш керак.
“Биламизки, Санкт-Петербургдаги компания билан боғлиқ машҳур воқеалардан кейин ФХХ нафақат 10 миллиард нақд пул, балки беш килограмм кокаин ҳам топди. Менинг назаримда бундай экспертиза ўтказилиши керак эди, лекин ўтказилмади”, — дея қўшимча қилди Путин.
Россия президенти “вагнерчи”лар ҳақида гапирар экан, Россияда хусусий ҳарбий компаниялар мавжуд эмаслиги ва ҳеч қачон мавжуд бўлмаган, чунки ХҲКлар тўғрисида қонун йўқлигини таъкидлади.
“Бу журналистик ном эди — хусусий ҳарбий компания”, — деди Путин.
Унинг сўзларига кўра, Россия ҳукумати ХҲКлар керакми ёки йўқ, деган масалада якдил фикрга эга эмас. Шу билан бирга, у “Вагнер”нинг бир неча минг жангчилари Россия Қуролли кучлари билан шартномалар имзолаганини таъкидлади.
Евгений Пригожиннинг самолёти Тверь вилоятида 23 август куни, “Вагнер” исёнидан икки ой ўтиб ҳалокатга учради. Бортдаги 10 кишининг барчаси ҳалок бўлган. “Росавиция” хабарига кўра, бортда бошқалар қаторида Пригожиннинг ўзи ва “Вагнер” қўмондони Дмитрий Уткин ҳам бўлган. Тергов қўмитаси уларнинг вафот этганини тасдиқлади.
Изоҳ (0)