Россиянинг Украинага қарши урушида Авдеевка учун жанг энг қимматлиси бўлди. Бу ҳақда Тhе New York Times хабар берди.
Украина қуролли кучларининг артиллерияси шаҳарга яқинлашганда Россиянинг зирҳли техникаси ва пиёда аскарлари колоннаси жуда катта йўқотишларга учради. NYT’нинг ёзишича, жанг бошланганидан деярли уч ҳафта ўтгач, рус армияси ўзи кутган тезкор муваффақиятга эриша олмади. Авдеевка яқинидаги русларнинг йўқотишлари Угледарга ҳужум пайтидаги йўқотишлардан каттароқдир.
Авдеевкадаги катта ҳужумнинг биринчи кунидаги жанглар шунчалик шиддатли эдики, 110-алоҳида механизациялашган бригадада дронлар тугади ва қўшимча кучлар учун яқин атрофдаги 109-бригадага мурожаат қилинди.
Журналистларнинг қайд этишича, Авдеевка 2014 йилдан бери Россия Қуролли кучлари нишонига айланган. 109-ҳудудий мудофаа бригадаси аскарининг айтишича, бу бутун уруш давомида шаҳарга қилинган энг шафқатсиз ҳужумдир.
“Бизда максимум ярим кунлик сукунат ҳолати бўлган”, — деди у.
Қайд этилишича, Украина қуролли кучлари Россиянинг фронт чизиғи бўйлаб асосий автомобиль ва темирйўллардан фойдаланишини тўсишда давом этмоқда. Шунинг учун Авдеевка босқинчилар учун стратегик аҳамиятга эга. Уни қўлга киритиш Украина қўшинларини Донецкдан узоқлаштиради ва бу ҳудудда рус қўшинлари учун асосий темирйўл ва автомобиль йўлларини очади.
Бундан ташқари, шаҳар сиёсий аҳамиятга эга. Йиллик қаршиликлардан сўнг шаҳарни қўлга киритиш Россия президенти Владимир Путин учун қиш яқинлашаётганда катта муваффақият бўлади.
Изоҳ (0)