Франция президенти Эммануэл Макрон расмий ташриф билан Қозоғистонга келди. Бу ҳақда Tengrinews хабар берди.
Пойтахт аэропортида Макронни бош вазир Алихон Смаилов кутиб олди. Қисқа суҳбат чоғида ҳукумат раҳбари ушбу ташриф Остона ва Париж ўртасидаги “стратегик шерикликни янада ривожлантиришга янги суръат бағишлашига” ишонч бирдирди.
Франция раҳбари қозоғистонлик ҳамкасби Қосим-Жўмарт Тўқаев билан савдо-иқтисодий, сармоявий ва энергетика соҳаларида ҳамкорликни мустаҳкамлаш бўйича музокаралар ўтказади, шунингдек, халқаро ва минтақавий кун тартибидаги масалаларни муҳокама қилади.
Эслатиб ўтамиз, Шавкат Мирзиёевнинг таклифига биноан Франция президенти Эммануэл Макрон 1—2 ноябрь кунлари расмий ташриф билан мамлакатимизда бўлади.
Ташриф дастурига мувофиқ, Самарқанд шаҳрида олий даражадаги музокаралар бўлиб ўтади, уларда Ўзбекистон билан Франция ўртасидаги кўп қиррали муносабатларни янада ривожлантириш масалалари кўриб чиқилади.
Ўзбекистон ва Франция раҳбарлари икки мамлакатнинг етакчи компаниялари ва банк-молия институтлари иштирокидаги қўшма бизнес форуми ишида ҳам иштирок этади.
Изоҳ (0)