Фармацевтика соҳасида Афғонистон билан ҳамкорлик алоқалари кенгаяди, деб хабар бермоқда Соғлиқни сақлаш вазирлиги матбуот хизмати.
Ўзбекистон бош вазири ўринбосари Жамшид Хўжаев бошчилигидаги делегация Афғонистон ислом амирлиги билан ҳамкорликни янада ривожлантириш мақсадида Кобулга борганди.
Соғлиқни сақлаш вазирлиги хабарига кўра, халқаро бизнес марказида ташкил этилган Made in Uzbekistan кўргазмасида Фармацевтика тармоғини ривожлантириш агентлиги директори Абдулла Азизов раҳбарлигидаги бир гуруҳ соҳа масъул ходимлари ҳам иштирок этди. Бу ерда 300 дан ортиқ тиббий маҳсулотлар намойиш қилинди.
Афғонистон соғлиқни сақлаш вазирлиги Фармацевтика хизмати директори Ҳамид Формулой томонидан Ўзбекистонда ишлаб чиқарилган дори препаратлари ва маҳсулотларини Афғонистонга етказиб бериш борасида рўйхатдан ўтказишни соддалаштириш бўйича таклифлар берилди.
Бу масалада тиббий маҳсулотларни рўйхатга олиш ваколатига эга бўлган Афғонистон озиқ-овқат ва дори воситалари миллий уюшмаси билан ҳамкорликни йўлга қўйиш бўйича амалий ёрдам кўрсатиладиган бўлди.
Учрашувлар доирасида Афғонистон тадбиркорлар маслаҳат кенгаши соғлиқ масаласи бўйича ўринбосари доктор Муҳаммад Ҳошим Ваҳааж билан ушбу мамлакатдаги хусусий шифохоналарга дори воситалари, тиббий буюм ва тиббий техникаларни Ўзбекистондан импорт қилиш, беморларни Ўзбекистонга даволашга юбориш масаласи муҳокама этилди.
Шунингдек, Ўзбекистондаги тиббий маҳсулотлар ва даволаш жараёнлари билан танишиш мақсадида Афғонистон делегацияси ташрифи амалга оширилиши бўйича келишувга эришилди.
Изоҳ (0)