Ijtimoiy tarmoqda Toshkent viloyati Sog‘liqni saqlash boshqarmasi boshlig‘i Ulug‘bek Abdug‘aniyevning viloyatda ikki kunlik hashar eʼlon qilingani, unda tibbiyot xodimlari qatnashishi shartligini aytgan audiosi tarqaldi.
Ovozli xabarda Abdug‘aniyev viloyat, tuman va shahar tibbiyot birlashmalari rahbarlariga “o‘zini erkakman degan” shifokorlar hasharga chiqishi zarurligini taʼkidlagan.
“Bugungi hashar yakunlanyapti. Rasmlardan iborat hisobotlarga qaraydigan bo‘lsak, barcha tibbiyot muassasalarida aksariyat hasharda ishtirok etganlar o‘rta va kichik tibbiyot xodimlari, boshqa xo‘jalik bo‘limlaridagi xodimlardan iboratligini ko‘rib turibmiz. Har bir rahbarga topshiriq: ertaga ertalabdan erkak shifokorlarni olib chiqib, hasharda ishlarni tashkil qilasizlar. Bu erkak shifokorlarga na bir tartib bor, na bir talab bor. Bilgan ishini qilib yuribdi. Shu ovozli xabar har bir o‘zini erkakman degan shifokorga yetib borsin. Ertalab hasharda erkak shifokorlar qatnashishi shart. Qo‘linglarda ro‘yxati bo‘lsin, kadrni biriktirib qo‘ying. Keldimi, nima ish qildi, qo‘lida asbobi bilan ketmon, grabli, qaychi arra va hokazo. To‘liq nazoratga olinglar”,—degan u.
Kun.uz muxbiri Ulug‘bek Abdug‘aniyev bilan telefon orqali bog‘lanib, holat yuzasidan izoh olgan. Suhbatda SSB boshlig‘i tibbiyot xodimlarini hasharga jalb qilishni majburiy mehnat deb hisoblamasligini aytgan.
“Har bir hududda kuz-qishga tayyorgarlik, shanbalik, axlatdan tozalash, ko‘chat ekish va boshqa ishlarni amalga oshirsin, deb topshiriq berganman. Uni qanday talqin qilishayotganidan esa xabarim yo‘q. Yo‘q, bu majburiy mehnatga kirmaydi. Muhtaram prezidentimizning o‘zlari aytdilar. Maktab, shifoxona hududida tozalash ishlarini olib borish qanday qilib majburiy mehnatga kiradi? Hech kim ularga ko‘chaga chiqib ishla deyayotgani yo‘q-ku”, – degan Ulug‘bek Abdug‘aniyev.
SSB boshlig‘i maktab va tibbiyot birlashmalari hududini tozalash o‘qituvchi va shifokorlarning funksional vazifasiga kiradimi, deya berilgan savolga ham javob qaytargan.
“Bunday ishlar hamshira va o‘qituvchilarning kasbiy vazifasiga kirmaydi, ammo xodimlarning jamoa shartnomasida ularning jamoaviy, ommaviy tadbirlarda qatnashishi kerakligi Kasaba uyushmalari va boshqalar tomonidan ko‘rsatiladi. Xodimlar ko‘cha tozalashga jalb qilinayotgani yo‘q-ku. Har bir tashkilot hududida bo‘limlar obodonlashtiradigan, qarab turadigan hududlari bor, o‘sha joylarga masʼul qilib belgilab qo‘yilgan”, – degan u.
“Daryo” muxbiri voqeaning huquqiy jihatlari bo‘yicha izoh olish maqsadida Kambag‘allikni qisqartirish va bandlik vazirligi axborot xizmati rahbari Faxriddin Hayit bilan bog‘landi. Maʼlum qilinishicha, holat nazoratga olingan.
“Hozirda Mehnat inspeksiyasi vaziyatni o‘rganmoqda”, —dedi vazirlik masʼuli.
Maʼlumot uchun, Ulug‘bek Abdug‘aniyev 2023-yilning may oyida Toshkent viloyati sog‘liqni saqlash boshqarmasiga rahbar etib tayinlangan.
Izoh (0)