Қашқадарё вилоятининг Нишон тумани ҳокими Мухтор Ҳайитмуродов ишдан олингани ҳақида хабар берилганди. Ҳокимлик ахборот хизмати раҳбари Илёс Маҳмудов хабарни рад этди.
Ижтимоий тармоқларда туман ҳокими Мухтор Ҳайитмуродовнинг лавозимидан озод этилиши мумкинлиги ҳақидаги хабарлар тарқалмоқда. Бу гаплар ҳақиқатга тўғри келмайди. Нишон тумани ҳокими Мухтор Ҳайитмуродов айни пайтда ўз ишини давом эттирмоқда ва кун тартибига мувофиқ, белгиланган вазифалар, чора-тадбирлар ижроси билан банд. Тасдиқланмаган ахборотларни тарқатиш қонунчиликка мувофиқ жавобгарликка сабаб бўлишини эслатамиз, — дейди Мухтор Ҳайитмуродовнинг матбуот котиби.
Нишон тумани ҳокими Мухтор Ҳайитмуродов Нишон туманига дастлаб 2012 йил ҳоким этиб тайинланган бўлиб, 2016 йилгача раҳбарликни амалга оширганди. 2018 йилдан яна қайта туман ҳокими сифатида иш бошлаган Мухтор Ҳайитмуродов айни кунгача туманни бошқариб келмоқда.
Аввалроқ вилоятнинг Қарши, Деҳқонобод туманлари ва Шаҳрисабз шаҳрида ҳоким алмашганди. Президентнинг вилоятга ташрифи чоғида Қарши туманидаги мактаб ва туман тиббиёт бирлашмасининг аянчли аҳволи давлат раҳбарини ранжитгач, туман ҳокими Беҳзод Юсупов лавозимидан олиниб, ўрнига айни кунга қадар Деҳқонобод тумани ҳокими сифатида ишлаб келган Зоир Алиқулов тайинланганди. Зоир Алиқулов ўрнини эса Шаҳрисабз шаҳрига раҳбарлик қилиб келган Акром Сулаймонов эгаллаган. Акром Сулаймоновнинг биринчи ўринбосари сифатида фаолият юритиб келган Акамурод Узоқовга Шаҳрисабз шаҳар ҳокими вазифасини вақтинча бажариш юклатилди.
Изоҳ (0)