Хитойнинг Ўзбекистондаги элчихонаси томонидан ўтказилган брифингда Ўзбекистон–Хитой ўртасида визасиз режим жорий қилиниши мумкинлигини айтиб ўтилди, дея хабар бермоқда “Дарё” мухбири.
Тадбирда Ўзбекистондаги фавқулодда ва мухтор элчиси Юй Сзюн визасиз режимни жорий этиш Хитой ҳукуматида кучли хоҳиш борлигини таъкидлаб ўтди.
“Лекин бу масалаларни мутахассислар орқали муҳокама қилиш ва келишиш керак. Ҳозир Хитой тарафи бу масалани диққат билан ўрганмоқда. Дастлаб виза олиш тартиби енгиллаштирилади, кейинроқ бошқа масалаларни кўриб чиқишга тайёрмиз”, — деди элчи.
Шунингдек у Ўзбекистон Хитой фуқаролари учун 10 кунлик визасиз режим жорий қилганлигидан миннатдорлигини билдирди.
Хитой фуқаролари учун ўн кунлик визасиз режим
Мамлакатлар ўртасида туризм соҳасидаги ҳамкорлик ҳам изчил ривожланиб бормоқда. Ўзбекистон ҳам Хитой сингари бой тарихий-маданий меросга, Тошкент, Самарқанд, Бухоро, Хива, Шаҳрисабз, Қўқон, Фарғона каби ноёб қадимий меъморий ёдгорликларга эга бўлган ранг-баранг мамлакатдир.
2010 йилдан бошлаб Ўзбекистонга Хитой фуқароларининг гуруҳли саёҳатлари учун туристик давлат мақоми берилди, 2017 йилда эса беш йилга мўлжалланган туризм соҳасида ҳамкорликни ривожлантириш дастури қабул қилинди. 2021 йил март ойидан бошлаб Хитой фуқаролари учун ўн кунлик визасиз режим амал қилади.
Кўрилган чора-тадбирлар туфайли кейинги йилларда Ўзбекистонга хитойлик сайёҳлар оқими сезиларли даражада ошди. 2017-2019 йилларда уларнинг сони 19 мингдан 54 минг нафардан ошди. Бироқ сўнгги уч йил ичида пандемия бошланиши билан мамлакатлар ўртасидаги сайёҳлар оқими қисқарган ва 10 минг кишидан ошмаган.
Ўзбекистон президенти ташаббуси билан 2023 йил Марказий Осиё ва Хитой халқлари маданияти ҳамда санъати йили деб эълон қилинди.
Аввалроқ Хитой элчиси Ўзбекистон—Қирғизистон—Хитой темирйўлининг тақдири ҳақидаги саволга жавоб берган эди.
Изоҳ (0)