Қашқадарё вилоятининг Шаҳрисабз туманида ичимлик сувидан экинларни суғориб келган фуқаро жазоланди. Бу ҳақда “Қашқадарё сув таъминоти” ахборот хизмати раҳбари Ихтиёр Умаров хабар берди.
Маълум қилинишича, 6 октябрь куни Жиноят ишлари бўйича Шаҳрисабз туман судида шу туманнинг Уймовут қишлоғида яшовчи фуқаро Й.А.га нисбатан қўзғатилган жиноят иши кўриб чиқилди.
Маълум бўлишича, судланувчи фермер хўжалиги раҳбари бўлиб, Шаҳрисабз—Қарши магистрал қувурига д-76 мм ли қувур орқали ноқонуний уланиб, ичимлик сувидан экинларни суғориб келган. Мазкур қонунбузилиш ҳолати “Қашқадарё сув таъминоти” МЧЖ ва Ичимлик сувидан фойдаланишни назорат қилиш вилоят ҳудудий инспекцияси ходимлари томонидан ўтказилган рейд тадбирлари давомида аниқланган.
Суд тўпланган ҳужжатлар ва томонларнинг кўрсатмаларини ўрганиб, Й.А.га 1 йил муддатга озодликдан чеклаш жазосини тайинлади. Шунингдек, ундан “Қашқадарё сув таъминоти” фойдасига 60 693 732 сўм зарар ундириладиган бўлди.
Бундан аввал вилоятнинг Нишон туманида ичимлик сувидан ноқонуний фойдаланиб, деҳқон хўжалигини суғориб келган фуқаро 3 йилга қамалганди. Ундан 282 миллион 716 минг 280 сўм зарар ундирилиши ҳам белгиланганди.
Изоҳ (0)