Қозоғистон ҳукумати маҳаллий корхоналарни қўллаб-қувватлаш учун Мудофаа-саноат комплексини ривожлантириш жамғармасини тузиш қарорини тасдиқлади. Ҳукумат йиғилишида республика бош вазири Алихан Смаилов жамғарма йил охиригача яратилишини маълум қилди, деб хабар бермоқда Kazakhstan today.
Ҳукумат раҳбари, шунингдек, ўтган ҳафта Қозоғистонда илк бор “Иннопром” халқаро саноат кўргазмаси ўтказилганини, унинг асосий мавзуси янги давр саноат стратегияси бўлганини ҳам эслатди.
“Глобал тенденцияларни ҳисобга олган ҳолда, Саноат вазирлиги ва манфаатдор давлат идоралари корхоналарда инновацион технологияларни жорий этишни рағбатлантириш бўйича янги ёндашувларни ишлаб чиқиши керак”, — деди Қозоғистон бош вазири.
Сентябр ойи бошида Қозоғистон президенти Қосим-Жўмарт Тўқаев мамлакатнинг ўзида мудофаа ишлаб чиқариш циклини яратиш Қозоғистоннинг импортга қарамлигини камайтирадиган энг муҳим вазифа эканини айтганди.
“Қозоғистон армияси юқори технологияли қурол-яроғ ва ҳарбий техника, жумладан зирҳли техника, учувчисиз учар аппаратлар ва замонавий ўқ отиш қуроллари билан таъминланиши керак”, — дея таъкидлаган Тўқаев.
Бугунги кунда Қозоғистонда ҳарбий техниканинг тўлиқ ишлаб чиқариш циклига эга корхоналар мавжуд эмас.
Саноат ва инфратузилмани ривожлантириш вазирлиги 2022 йил декабрь ойида Мудофаа саноатини ривожлантириш жамғармасини ташкил этиш тўғрисидаги ҳукумат қарори лойиҳасини тайёрлаганди. Унинг фаолияти асосий мавзуси маҳаллий илмий-техник ишланмаларни молиявий қўллаб-қувватлаш ва ҳарбий-саноат комплекси ташкилотларини модернизация қилишдир.
Маълумот учун 2019 йилда Қозоғистоннинг ҳарбий бюджети 1,8 миллиард долларни, 2020 йилда – 1,5 миллиард долларни, 2021 йилда – 1,6 миллиард долларни, 2022 йилда – 1,1 миллиард долларни ташкил этган.
Изоҳ (0)