АҚШ президенти Жо Байден маъмурияти юз минглаб америкалик фуқароларни Яқин Шарқдан эвакуация қилишга тайёрланмоқда.
Бу ҳақда АҚШ ҳукуматининг фавқулодда вазиятлар режалари билан таниш бўлган расмийларга таяниб, Тhе Washington Post нашри хабар берди.
Нашрнинг қайд этишича, Исроил мудофаа кучлари Фаластиннинг ҲАМАС ҳаракати жангчиларини йўқ қилиш учун Ғазо секторида қуруқликдаги операцияни ўтказишга тайёрланаётгани ҳақида эълон қилинганидан кейин эвакуация қилиш зарурати кескин ошган.
WP суҳбатдошларига кўра, ҳозирги вазиятда нафақат Исроилда, балки қўшни Ливанда яшовчи АҚШ фуқаролари ҳам алоҳида ташвиш уйғотмоқда.
АҚШ Давлат департаменти ҳисоб-китобларига кўра, ҲАМАС Исроилга ҳужум қилган пайтда у ерда 600 мингга яқин, Ливанда эса 86 минг АҚШ фуқароси бўлган.
Ливандаги “Ҳизбуллоҳ” ҳаракати ҲАМАСни қўллаб-қувватлаганидан кейин америкаликларни Ливандан эвакуация қилиш зарурати муҳим масалага айланди. Қўшма Штатлар ҲАМАСга эргашаётган гуруҳ жангчилари шимолдан Исроилга ҳужум қилиши ва шу орқали иккинчи фронтни яратишидан хавфсирамоқда.
Изоҳ (0)