АҚШ Исроил Ғазода қуруқликдаги операцияни ўтказиш учун ҳали аниқ режа ишлаб чиқмаган деб ҳисоблайди. Бу ҳақда манбаларга таяниб, The New York Times хабар берди.
Нашр суҳбатдошларига кўра, Исроил армияси қўмондонлиги бу ҳужум мақсадли авиазарбалар ва махсус кучлар гуруҳларини қўллаш билан боғлиқ операция бўладими ёки Ғазога танклар ва пиёдалар киритиладими — ҳозирча аниқлаб олмаган.
Иккала вариант ҳам тинч аҳоли ва ҳарбий хизматчиларнинг қурбон бўлишига олиб келади, аммо тўлиқ миқёсли операция ўтказилса, йўқотишлар кўпроқ бўлади.
Америка томонининг фикрига кўра, Исроил қуруқликдаги операция давомида қандай мақсадларга эришиш кераклиги ҳақида аниқ тасаввурга эга эмас, дейди манбалар. Бу ҳолат Исроил Ғазода операция ўтказишга ҳали тўлиқ тайёр эмаслигидан хавотир уйғотади.
Axios аввалроқ хабар берганидек, АҚШ Исроил армиясига консултация ўтиш учун денгиз пиёдалари корпуси генерал-лейтенанти Жеймс Глинни Исроилга юборганди. Бироқ, Пентагон расмийларининг таъкидлашича, буни АҚШ ҳарбийлари Исроил мудофаа кучлари учун қарор қабул қилади деб тушунмаслик керак.
Америка ОАВ манбаларига кўра, АҚШ ва Европа Иттифоқи қуруқликдаги операцияни кейинга қолдиришни сўраган, бунинг ўрнига музокаралар йўли билан гаровга олинганларни озод қилишга эришиш кераклиги айтилмоқда. Расмий равишда Исроил ҳукумати АҚШ қуруқликдаги операция бўйича ҳеч қандай босим ўтказмаётганини билдирган.
Изоҳ (0)